ខេត្តបន្ទាយមានជ័យ៖ សមត្ថកិច្ចចម្រុះខេត្តបន្ទាយមានជ័យ បានចេញប្រតិបតិ្ដការថ្នាំញៀន រហូតឈានដល់ការឃាត់ខ្លួនមេខ្លោង និងបក្ខពួក សរុបចំនួន៥នាក់ និងដកហូតវត្ថុតាងជាច្រើន កាលពីព្រឹក ថ្ងៃទី១៩ ខែកញ្ញា ឆ្នាំ២០១៨ នៅក្នុងភូមិសាស្រ្តក្រុងសិរីសោភ័ណ ខេត្តបន្ទាយមានជ័យ និងផ្ទះជួលរបស់ជនសង្ស័យ នៅក្នុងក្រុងសៀមរាប ខេត្តសៀមរាប។
មន្ត្រីនគរបាលខេត្តបន្ទាយមានជ័យ បានឲ្យដឹងថា មុនពេលឈានដល់ការឃាត់ខ្លួនជនសង័្សយទាំង៥នាក់នោះ សមត្ថកិច្ចជំនាញខេត្ត បានស្រាវជ្រាវតាមជំនាញរបស់ខ្លួន រហូតកំណត់បានមុខសញ្ញារបស់ជនសង័្សយ ដែលតែងតែធ្វើសកម្មភាពចែកចាយ នៅក្នុងខេត្តសៀមរាប ខេត្តបាត់ដំបង និងខេត្តបន្ទាយមានជ័យ។ បន្ទាប់ពីស៊ើបដឹងហើយ កម្លាំងសមត្ថកិច្ចចម្រុះ ក្រោមការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ ក៏បានចេញប្រតិបត្ដិការបង្រ្កាប និងចាប់ខ្លួនបានជាបន្តបន្ទាប់ សរុបចំនួន៥នាក់ រួមនឹងវត្ថុតាង។
លោកឧត្តមសេនីយ៍ត្រី ចាប សុប្ញទ្ធិ ស្នងការរងទទួលបន្ទុកប្រឆាំងបទល្មើស បានឲ្យដឹងថា នៅក្នុងការបង្រ្កាបមុខសញ្ញាចែកចាយថ្នាំញៀនខាងលើនេះ សមត្ថកិច្ចចម្រុះបានឃាត់ខ្លួនជនសង័្សយចំនួន៥នាក់។ ក្រៅពីឃាត់ខ្លួនជនសង័្សយខាងលើនេះ សមត្ថកិច្ចក៏បានរឹបអូសបានវត្ថុតាងជាច្រើន រួមមាន ទី១-ថ្នាំ ញៀនមេតំហ្វេតាមីន (WY) ចំនួន៨៧៦៤គ្រាប់មានទម្ងន់៧៩៩,៩៤ក្រាម ទី២-ថ្នាំញៀនមតំហ្វេតាមីនទឹកកកទម្ងន់១៩៩៥,០១ក្រាម ទី៣-ថ្នាំញៀនកេតាមីនមានទម្ងន់៨,៥១ក្រាម ទី៤-ថ្នាំគ្រាប់អ៊ិចស្រា្តស៊ីមានទម្ងន់២,៩៦ក្រាម ទី៥-ជញ្ជីងថ្លឹងគ្រឿងញៀន៤គ្រឿង ទី៦-អាវុធខ្លី៤ដើម ក្នុងនោះអាវុធខ្យល់១ដើម និងទី៧-រថយន្តចំនួន២គ្រឿង។
ក្រោយពេលបង្រ្កាបរួច សមត្ថកិច្ចជំនាញបានកសាងសំណុំរឿង បញ្ជូនជនសង័្សយទៅកាន់សាលាដំបូងខេត្តបន្ទាយមានជ័យ ដើម្បីចោទប្រកាន់តាមផ្លូវច្បាប់៕