ភ្នំពេញ ៖ នៅព្រឹកថ្ងៃទី១៨ កញ្ញា ២០១៨ នេះគណៈកម្មការចំពោះកិច្ច ចាប់ផ្តើមធ្វើការស្រាវជ្រាវស៊ើបអង្កេត ករណីលោកឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារ ត្រូវបានកូនចៅក្រោមឱវាទចោទប្រកាន់ថា បានស៊ីដាច់លុយឧបត្ថម្ថចំនួន៨០លានរៀល ដែលជាលុយឧបត្ថម្ភដល់អង្គភាព ដើម្បីចែកមន្ត្រីអាវុធហត្ថ ។
ការចុះធ្វើអធិការកិច្ចនេះ បន្ទាប់ពីមានការចោទប្រកាន់មេបញ្ជាការកងរាជអាវុធហត្ថខេត្តព្រះវិហារ ទើបលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថផ្ទៃប្រទេស បានបញ្ជាឲ្យគណៈកម្មការចុះធ្វើអធិការកិច្ច ដើម្បីឲ្យដឹងការពិត ថ្ងៃទី១៧ កញ្ញា ។
ប្រភពច្បាស់ការណ៍មួយ បានឲ្យដឹងថា លោក កង សៅគុណ បានស៊ីដាច់លុយរបស់លោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការកងយោធពលខេមរភូមិន្ទ និងជាមេបញ្ជាការកងអង្គរក្សសម្តេចតេជោ ប្រមាណជា ៨០លានរៀល ដែលបានឧបត្ថម្ភដល់អង្គភាព «ខ26-2» កាលពីមុនពេលបោះឆ្នោតជ្រើសតាំងតំណាងរាស្ត្រ នីតិកាលទី៦ ។
ប្រភពដដែលបានទម្លាយទៀតថា ក្រៅពីលុយ៨០លានរៀល លោក កង សៅគុណ បានធ្វើសកម្មភាពមិនប្រក្រតីជាច្រើនទៀត រួមមាន ៖
១៖ យកដីអង្គភាព មកធ្វើជាកម្មសិទ្ធិរបស់ខ្លួន ដូចជាដីនៅស្នាក់ការស្រយ៉ង់ និង ដីស្នាក់ការកំពង់ស្រឡៅ។
២៖ បង្ខំមេបញ្ជាការមូលដ្ឋានតាមបណ្តាលក្រុងស្រុក កាត់ប្រាក់ខែក្នុងមួយខែ ៥០ម៉ឺនរៀល ដើម្បីធ្វើអគារថ្មតាមបណ្តាក្រុង-ស្រុក ហើយអួតថាខ្លួនជាអ្នកកសាង។
៣៖ គំរាមគំហែងមេបញ្ជាការរង រហូតដល់យុទ្ធជន ប្រមាថចាប់ដាក់គុក កាត់ឈ្មោះចោល។
៤៖ ចាប់ឡានដឹកឈើខុសច្បាប់នៅស្រុកជ័យសែន ជំរិតទាប្រាក់ចំនួន ៦លានរៀល កាលពីថ្ងៃទី០៣ខែកញ្ញាឆ្នាំ២០១៨ជាថ្នូរនឹងការដោះលែងទៅវិញ។
៥៖ ចំពោះឡានដឹកឈើខុសច្បាប់ចេញពីដេប៉ូនៅក្នុងខេត្ត គឺត្រូវបង់ក្នុងមួយឡានចំនួន ៥០០ដុល្លារ។
៦៖ ចំពោះឡានយីឌុបដឹកឈើខុសច្បាប់ផ្សេងៗទៀត ដែលឆ្លងកាត់ក្នុងខេត្តត្រូវបង់ក្នុងមួយឡានចំនួន ១៥០ដុល្លារ។
បើតាមប្រភពពីមន្ត្រីអាវុធហត្ថខេត្តព្រះវិហារ បានបញ្ជាក់អះអាងថា ការទទួលប្រាក់ពីសកម្មភាពផ្ទុយច្បាប់នេះ លោក កង សៅគុណ ប្រគល់ឲ្យលោក កង ពុទ្ធា ជាប្អូនបង្កើតរបស់លោក ជាអ្នកយកលុយ នៅចំណុចស្នាក់ការសន្តិសុខ នៅព្រំប្រទល់ខេត្តព្រះវិហារ និងកំពង់ធំ ហើយលោក ចាន់ សី ជាអ្នកចាំយកលុយនៅស្នាក់ការសន្តិសុខ ព្រំប្រទល់ខេត្តព្រះវិហារ និងសៀមរាប ។
ចំណែកឯ លោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ បានបដិសេធថា លោកមិនបានប្រព្រឹត្តដូចអ្វីដែលចោទប្រកាន់នោះទេ ។ ទោះជាយ៉ាងណា រឿងនេះទុកឲ្យគណៈកម្មការចំពោះកិច្ច ពិនិត្យមមើលចុះ ៕