ខេត្តស្វាយរៀង ៖ កម្លាំងសមត្ថកិច្ចនគរបាលប៉ុស្តិ៍ និងអធិការស្រុក បានចុះហាមឃាត់មិនអោយបង្រៀន វគ្គបណ្តុះបណ្តាលពីវិធីចិញ្ចឹមមាន់ តាមបែបធម្មជាតិនិងការផ្សំចំណីមាន់ តាមបែបធម្មជាតិរបស់ប្រជាសហគមន៍ នៅភូមិត្រពាំងពពេល ឃុំអំពិល ស្រុករមាសហែក ខេត្តស្វាយរៀង នេះបើតាមគេហទំព័រព័ត៌មានក្នុងស្រុកមួយបានចុះផ្សាយនៅថ្ងៃទី១៧ កញ្ញា ២០១៨ នេះ។
ការចុះឃាត់ប្រជាសហគមន៍នៅពេលនេះ បង្កអោយមានការងើយឆ្ងល់យ៉ាងខ្លាំងពីសំណាក់ប្រជាពលរដ្ឋ ខណៈដែលតំណាងប្រជាសហគមន៍ ហៅទង្វើនេះថា ការគំរាមកំហែង និងរារាំងការអភិវឌ្ឍន៍កម្រិតជីវភាពរបស់ប្រជាពលរដ្ឋ ។
អ្នកស្រី ខៀវ សារ៉ុន តំណាងប្រជាសហគមន៍ក្នុងភូមិពពេល ថ្លែងប្រាប់អោយដឹងថា មុនបើកវគ្គបណ្តុះបណ្តាលពីវិធីចិញ្ចឹមមាន់នេះ អ្នកភូមិបានទៅសុំការអនុញ្ញាតិ ពីអភិបាលស្រុក និងការិយាល័យកសិកម្មស្រុករួចហើយដែរ ហើយក៏ទទួលបានការយល់ព្រមឯកភាព ផងដែរ ។
អ្នកស្រី បន្តថា ប៉ុន្តែដល់ពេលនង្រៀន បែរជាសមត្ថកិច្ចចុះមកបិទវគ្គបណ្តុះបណ្តាលវិញ ដោយនគរបាលប្រាប់ថា មកពីអ្នកភូមិ មិនសុំច្បាប់ជួបជុំគ្នា ពីសាលាខេត្ត ។
អ្នកស្រី បានហៅទង្វើនេះថា ជាទង្វើដែលបង្អាក់ ការចង់ចេះ ចង់ដឹងរបស់អ្នកភូមិ ហើយអ្នកស្រីស្នើឱ្យសមត្ថកិច្ចថ្នាក់លើ មេត្តាអន្តរាគមន៍ដោះស្រាយចំពោះរឿងនេះផង ។
ប្រភពពីលោក ញ៉ាញ់ ផែន នាយប៉ុស្តិ៍នគរបាល និងរដ្ឋបាល ឃុំអំពិល ស្រុករមាសហែក បានប្រាប់អ្នកសារព័ត៌មានថា លោកមិនទាន់អាចបញ្ជាក់ពីករណីនេះអោយបានលម្អិតនៅឡើយទេ ដោយលោកសន្យាថា នឹងបំភ្លឺ នៅពេលក្រោយ ។
សូមបញ្ជាក់ថា វគ្គបណ្តុះបណ្តាលខ្លី ចែករំលែកបទពិសោធន៍ ពីវិធីចិញ្ចឹមមាន់របស់ប្រជាសហគមន៍ នៅភូមិត្រពាំងពពេល មានអ្នកចូលរួមចំនួន៣៤នាក់ ដែលមកពី៣៤គ្រួសារ ដែលរស់នៅស្រុករមាហែក ខេត្តស្វាយរៀង ។ ហើយវគ្គបង្រៀននេះ ផ្តោតសំខាន់ពីវិធីចិញ្ចឹមមាន់ ការជ្រើសរើសពូជមាន់ ចំណីមាន់ តាមបែបធម្មជាតិ ដើម្បីលើកស្ទួយកម្រិតជីវភាពរបស់ប្រជាពលរដ្ឋតែប៉ុណ្ណោះ ៕