ភ្នំពេញ ៖ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានបង្ហើបឲ្យដឹងថា សម្តេចជាអ្នករៀបចំផែនការផ្ទេរការឃុំខ្លួនលោក កឹម សុខា ពីពន្ធនាគារត្រពាំងផ្លុង មកឃុំខ្លួននៅក្នុងផ្ទះវិញ ។
ការថ្លែងបែបនេះរបស់សម្តេចក្រឡាហោម ស ខេង ធ្វើឡើងនៅក្នុងពិធីជួបជុំជាមួយសមាជិកគណបក្សប្រជាជន នៅក្នុងខេត្តព្រៃវែង កាលពីថ្ងៃទី១៦ កញ្ញា ២០១៨នេះ ហើយការសម្រេចនេះ ក៏បានធ្វើឡើងដោយមានការចរចារ និងការយល់ព្រមពីលោក កឹម សុខា ផងដែរ ។
សម្តេចក្រឡាហោម បានថ្លែងបញ្ជាក់ថា សម្តេចបានចាត់តាំងឲ្យមន្ដ្រីក្រសួងមហាផ្ទៃ ទៅចរចាជាមួយលោក កឹម សុខា ក្នុងពន្ធនាគារ និងប្រាប់ឲ្យចុះលេខា លើសេចក្ដីព្រាងលិខិតមួយ ដែលត្រូវបានដឹងថា លោក កឹម សុខា បានស្នើទៅអគ្គស្នងការនគរបាលជាតិ ឲ្យជួយការពារសន្តិសុខ និងសុវត្ថិភាពរូបលោកអំឡុងពេលត្រូវបានដាក់ឲ្យស្ថិតនៅក្រោមការឃុំខ្លួនក្នុងផ្ទះនេះ ។
សូមបញ្ជាក់ថា សាលាដំបូងរាជធានីភ្នំពេញ បានចេញដីកាសម្រេចដោះលែងលោក កឹម សុខា អតីតប្រធានគណបក្សសង្គ្រោះជាតិ ឲ្យនៅក្រៅឃុំបណ្តោះអាសន្ន ដោយដឹកចេញពីពន្ធនាគារត្រពាំងផ្លុងក្នុងខេត្តត្បូងឃ្មុំ មកផ្ទះរបស់លោកវិញ កាលពីវេលាម៉ោង៣ព្រឹក ថ្ងៃទី១០ កញ្ញា ដោយបញ្ហាសុខភាព៕
