ខេត្តកំពង់ស្ពឺ៖ ស្រ្ដីម្នាក់ឃើញប្ដីរបស់នាង ជិះម៉ូតូស៊េរីទំនើបគួរឲ្យសង័្សយត្រឡប់មកផ្ទះ ហើយមិនព្រមយកម៉ូតូនោះ ត្រឡប់ទៅធ្វើកន្លែងធ្វើការ នៅឯខេត្តព្រះសីហនុ វិញ ធ្វើឲ្យនាងភ័យខ្លាចមានការជាប់ពាក់ព័ន្ធនឹងបទល្មើសអ្វីផ្សេង ក៏យកម៉ូតូនោះទៅប្រគល់ឲ្យសមត្ថកិច្ច កាលពីវេលាម៉ោង២ និង៣០នាទីរសៀល ថ្ងៃទី១៤ កញ្ញា ឆ្នាំ២០១៨។
មន្រ្ដីនគរបាលស្រុកឧដុង្គ បានឲ្យដឹងថា ស្រ្ដីដែលយកម៉ូតូមកប្រគល់ឲ្យសមត្ថកិច្ចនោះ ឈ្មោះ រ៉ត ម៉ាច អាយុ២៤ឆ្នាំ មានប្ដីឈ្មោះ ឡុង ដែន អាយុ២៧ឆ្នាំ សព្វថ្ងៃធ្វើការជាសន្ដិសុខ នៅខេត្ដព្រះសីហនុ។ ពួកគេទាំង២នាក់ប្ដីប្រពន្ធ មានលំនៅក្នុងភូមិតាឡក ឃុំក្សេមក្សាន្ដ ស្រុកឧដុង្គ ខេត្តកំពង់ស្ពឺ។ រីឯម៉ូតូដែលនាងសង័្សយខ្លាចមានជាប់ពាក់ព័ន្ធនឹងបទល្មើសនោះ ម៉ាក ZOMER X លេខតួ 1F5107903 ពណ៌ត្រួយចេក លាយខ្មៅ គ្មានស្លាកលេខ។
មន្ត្រីនគរបាលដដែល បានបន្តថា មុនពេលកើតហេតុ ប្ដីរបស់នាងបានជិះម៉ូតូខាងលើ ចេញពីកន្លែងធ្វើការ នៅឯខេត្តព្រះសីហនុ ដើម្បីលេងនាងជាប្រពន្ធ។ លុះពេលប្ដីរបស់នាងត្រឡប់ទៅវិញ បែរជាមិនព្រមយកម៉ូតូនោះទៅជាមួយ ធ្វើឲ្យនាងសង័្សយ ក៏សាកសួរប្ដីរបស់នាង។ ប៉ុន្តែប្ដីរបស់នាងគ្រាន់តែឆ្លើយថា ខ្ចីម៉ូតូគេជិះ។
មន្រ្ដីនគរបាលដដែល បានបន្ដថា ដោយសារតែឃើញប្ដីរបស់នាង មិនព្រមយកម៉ូតូខាងលើត្រឡប់ទៅវិញ ធ្វើឲ្យនាងកើតមានការសង័្សយ ខ្លាចមានការជាប់ពាក់ព័ន្ធនឹងបទល្មើសអ្វីផ្សេង ទើបនាងយកម៉ូតូនេះ មកប្រគល់ជូនសមត្ថកិច្ច រក្សាទុកជាបណ្ដោះអាសន្ន ដើម្បីរង់ចាំប្តីរបស់នាងត្រឡប់មកវិញ សាកសួរម្តងទៀត។
ជាមួយគ្នានេះ សមត្ថកិច្ចនគរបាលស្រុកឧដុុង្គ បានកោតសរសើរស្ត្រីខាងលើថា នេះគឺជាគំរូដ៏ល្អមួយ ដែលប្រជាពលរដ្ឋគួរតែយកគំរូតាម ព្រោះរស់នៅក្នុងសង្គម ត្រូវតែគោរពច្បាប់ ដើម្បីកុំឱ្យមានការជាប់ពាក់ព័ន្ធទោសទណ្ឌដល់ខ្លួន៕