ខេត្តក្រចេះ៖ សាកសពរបស់បុរសមានវ័យប្រហែលជាង៤០ឆ្នាំ ត្រូវបានពលរដ្ឋប្រទះឃើញអណ្តែត នៅក្នុងទឹកបឹង ខាងក្រោយសាលាបឋមសិក្សាភូមិត្នោត ស្ថិតក្នុងឃុំពង្រ ស្រុកឆ្លូង កាលពីព្រឹក ថ្ងៃទី១៤ ខែកញ្ញា ឆ្នាំ២០១៨។
បើតាមសម្ដីរបស់គ្រួសារជនរងគ្រោះ បានឱ្យដឹងថា កាលពីយប់ ថ្ងៃទី១២ ខែកញ្ញា ឆ្នាំ២០១៨ កន្លងទៅនេះ ជនរងគ្រោះបានចេញពីផ្ទះបាត់ ដោយប្រាប់ក្រុមគ្រួសារថា គាត់ទៅរកចាប់សត្វគីង្គក់ នៅខាងក្រោយភូមិ។ ចាប់តាំងពីថ្ងៃនោះមក ពួកគាត់មិនបានឃើញជនរងគ្រោះ ត្រឡប់មកផ្ទះវិញ ហើយក្រុមគ្រួសារនាំគ្នាដើររកដែរ តែរកមិនឃើញ។ លុះមកដល់ថ្ងៃទី១៤ ខែកញ្ញា ឆ្នាំ២០១៨ ទើបពលរដ្ឋប្រទះឃើញសាកសព អណ្តែតក្នុងទឹកបឹង នៅខាងក្រោយភូមិ ក៏បង្កឲ្យភ្ញាក់ផ្អើលឡើង និងរាយការណ៍ទៅសមត្ថកិច្ច។
លោកវរសេនីយ៍ឯក ឆុង តូរ៉ាន់ អធិការនគរបាលស្រុកឆ្លូង បានឱ្យដឹងថា ជនរងគ្រោះ ឈ្មោះ អ៊ំ សារ៉ាន់ អាយុ៤៤ឆ្នាំ ជនជាតិខ្មែរ មានលំនៅក្នុងភូមិព្រែកសំរោងទី១ ឃុំខ្សាច់អណ្ដែត ស្រុកឆ្លូង ខេត្តក្រចេះ។
លោកអធិការនគរបាលស្រុកឆ្លូង បានបញ្ជាក់ថា បើតាមការពិនិត្យទៅលើដងខ្លួនសាកសព និងទីតាំងជុំវិញបរិវេណ រកឃើញស្លាកស្នាមនៅលើសាកសពផ្នែកខាងឆ្វេងមានស្នាមជាំក ទន់ និងមានស្នាមបែកលើត្របកភ្នែកខាងឆ្វេង។ ករណីនេះ លោកបានដាក់ការសន្និដ្ឋានថាជាអំពើឃាតកម្ម។
ក្រោយពេលធ្វើកោសល្យវិច័យរួចហើយ សមត្ថកិច្ចបានធ្វើកំណត់ហេតុ ប្រគល់សាកសពរបស់ជនរងគ្រោះ ជូនទៅក្រុមគ្រួសាររៀបចំធ្វើបុណ្យតាមប្រពៃណី។ បច្ចប្បន្ន សមត្ថកិច្ចកំពុងតែស្រាវជ្រាវ ស្វែងរកចាប់ខ្លួនជនដៃដល់ នាំមកផ្ដន្ទាទោសតាមច្បាប់៕