ស្វាយរៀង ៖ សាកសពបុរសមិនស្គាល់អត្តសញ្ញាម្នាក់ ត្រូវជនមិនស្គាល់មុខដឹកយកមកទម្លាក់ចោល នៅចម្ងាយ៥០ម៉ែត្រ ពីប៉ុស្ត៍រដ្ឋបាលសង្កាត់ច្រកម្ទេស ធ្វើឲ្យមានការភ្ញាក់ផ្អើលដល់អ្នកធ្វើដំណើរតាមដងផ្លូវ និងសមត្ថកិច្ចទាំងព្រឹក ។
ករណីសពគេយកមកផ្លុងចោលនេះ ត្រូវបានប្រទះឃើញនៅវេលាម៉ោង៦ព្រឹកថ្ងៃទី១៣ កញ្ញា ២០១៨ នៅភូមិសាលាទាន សង្កាត់ច្រកម្ទេស ក្រុងបាវិត ខេត្តស្វាយរៀង ។
សពជនរងគ្រោះ មានសប្បុរស ពាក់អាវខ្មៅ ស្លៀកខោខ្លី ហើយសព ត្រូវបានក្រុមជនល្មើស សម្លាប់នៅកន្លែងផ្សេង ហើយបានច្រកសព ក្នុងថង់ប្លាស្ទិចពណ៌ខ្មៅ ដឹកតាមរថយន្តតូច១គ្រឿង ពីទិសខាងកើត មកទម្លាក់ចោលនៅលើចិញ្ចើមថ្នល់ជាតិលេខ១ ។
ក្រោយពីសមត្ថកិច្ចជំនាញមកពិនិត្យ បានធ្វើកោសលវិច្ច័យសព នៅមិនទាន់ស្គាល់អត្តសញ្ញាណទេ ហើយសន្និដ្ឋានថា ជាករណីឃាតកម្ម ដោយសភាពសព មានបែកមាត់ បែកក្បាល និងស្នាមវ៉ៃចំក្បាលពីក្រោយ ហើយសមត្ថកិច្ច បានបញ្ជាក់ថា ពិតជាករណីឃាតកម្ម ប្រាកដមែន ។
បច្ចុប្បន្ន សាកសពត្រូវសមត្ថកិច្ចយកមកតម្កល់ទុក នៅវត្តជិតកន្លែងកើតហេតុ ហើយសមត្ថកិច្ចកំពុង ធ្វើការស្រាវជ្រាវរកមុខឃាតករ ដើម្បីយកមកផ្តន្ទាទោសតាមផ្លូវច្បាប់ ៕