កំពង់ស្ពឺ ៖ ពុកម៉ែបងប្អូន ប្រាកដជានៅចាំបេក្ខជនប្រឡងម្នាក់ ដែលប្រលងមួយបន្ទប់ មានតែម្នាក់ឯងគត់ កាលពីថ្ងៃទី២០ ខែសីហា ឆ្នាំ២០១៨ នោះ ហើយឯកឧត្តម ឱម យិនទៀង ប្រធានអង្គភាពប្រឆាំងអំពើពុករលួយ ចុះពិនិត្យផ្ទាល់ទៀត តើចង់ដឹងទេថា លទ្ធផលនៃការប្រលងបាក់ឌុបរបស់បេក្ខជនរូបនេះ ជាប់ ឫក៏ធ្លាក់ ?
យោងតាមការប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិចំណេះដឹងទូទៅ នៅថ្ងៃទី១០ ខែកញ្ញា ឆ្នាំ២០១៨ នៅមណ្ឌលខេត្តកំពង់ស្ពឺ បានបង្ហាញថា បេក្ខជនម្នាក់ដែលត្រូវអង្គុយ ក្នុងបន្ទប់១តែម្នាក់ឯង បានប្រឡងជាប់ហើយ ប្រឡងជាប់និទ្ទេស D ទៀតផង ។
បេក្ខជនខាងលើនេះ មានឈ្មោះ សេម វិចិត្រ អាយុ១៩ឆ្នាំ រស់នៅភូមិក្រាំងខ្នង ឃុំស្តុក ស្រុកគងពិសី ។
សូមរម្លឹកថា នៅមណ្ឌលបឋមសិក្សាវល្លិ៍ស បន្ទប់លេខ១៣ ដែលជាមណ្ឌលមួយ ស្ថិតក្នុងខេត្តកំពង់ស្ពឺ មានតែបេក្ខជនម្នាក់គត់ ចូលរួមប្រឡងសញ្ញាប័ត្រមធ្យមសិក្សាទុតិយភូមិ (បាក់ឌុប) ឆ្នាំនេះ ខណៈដែលឯកឧត្តម ឱម យិនទៀង ប្រធានអង្គភាពប្រឆាំងអំពើពុករលួយ ចុះពិនិត្យផ្ទាល់តែម្តង ។
ប្រធានមន្ទីរអប់រំខេត្ត បានប្រាប់ថា បានជាគេដាក់ឲ្យបេក្ខជនរូបនេះប្រឡងបន្ទប់១ម្នាក់ឯង ដោយសារតែគេជ្រើសរើសយកភាសាបារាំង ។
បើតាមបេក្ខជនឈ្មោះ សេម វិចិត្រ បានប្រាប់ថា រូបគេរៀននៅវិទ្យាល័យទ័ពមានជ័យ មានមិត្តភក្តិរួមថ្នាក់ធម្មតា ពេលប្រឡងឌីប្លូម ក៏ប្រឡងធម្មតា បន្ទប់១ មានបេក្ខជន២៥នាក់ ដូចគេឯងដែរ ប៉ុន្តែ អ្វីដែលចម្លែកនោះ ប្រឡងបាក់ឌុបឆ្នាំនេះ រូបគេត្រូវបានដាក់ឲ្យប្រឡងតែម្នាក់ឯង ។
ចំពោះបញ្ហានេះរូបគេមិនតូចចិត្តនោះទេ ថ្វីត្បិតរូបគេជាមនុស្សពិការ (ជើងឆ្វេង) ហើយមានជំងឺសើស្បែកទៀតផង ។ រឿងដែលគ្រូៗដាក់ឲ្យគេប្រឡងបន្ទប់១ ម្នាក់ឯង ទំនងជាគេរើសអើងដោយសារជំងឺសើស្បែករបស់គេហើយមើលទៅ ទើបគេត្រូវអង្គុយប្រឡងម្នាក់ឯងបែបនេះ ។ ហើយសង្ឃឹម៧០ភាគរយថានឹងជាប់ ។ ឥឡូវនេះ លទ្ធផល ពិតជាដូចបំណងរបស់បេក្ខជនរូបនេះហើយ ៕