រាជធានីភ្នំពេញ ៖ ប្អូនប្រុស ឆាយ លីអាន គឺជាបេក្ខជនសិស្សពូកែគណិតវិទ្យា ទាំងក្នុងប្រទេស និងឆាកអន្ដរជាតិ និងទទួលបានមេដាស និងមេដាយផ្សេងៗទៀត តែគួរអោយហួសចិត្តនោះគឹ បែជាលទ្ធផលប្រឡងបាក់ឌុបមិនបានល្អ ពោលគឺធ្លាក់មុខវិជ្ជាគណិត ទទួលបាននិទ្ទេស F ទៅវិញ ជារឿងដែលនឹកស្មានមិនដល់ និងពិតជាមិនគួរអោយជឿ ។
នេះជាលទ្ធផលដែលគេមិនអាចទទួលយកបានឡើយ ។ លីអាន សង្កត់ធ្ងន់ថា ករណីនេះគឺអាចមកពីការស្រង់ពិន្ទុតាមរយៈកុំព្យូទ័រ មិនត្រឹមត្រូវ ព្រោះតាមរយៈការធ្វើវិញ្ញាសាគណិតវិទ្យាពេលប្រឡង លីអាន អាចធ្វើបានយ៉ាងល្អបំផុត ហើយវិញ្ញាសាមិនលើសពីកម្រិតសមត្ថភាពរបស់គេឡើយ ។
យុវជនជាសិស្សពូកែ ផ្នែកគណិតវិទ្យា បានស្នើ និងអំពាវនាវសុំអោយមានការសើរើឡើងវិញ នូវកិច្ចការរបស់គាត់ ដែលហាក់មិនសាកសមជាមួយនឹងការខិតខំរបស់ខ្លួនឡើយ ។ ខណៈដែល ឆាយ លីអាន ស្នើទៅកាន់មន្ទីរអប់រំខេត្តកំពត ដើម្បីរកដំណោះស្រាយទៅលើបញ្ហានេះ ហើយប្រសិនបើមន្ទីរអប់រំខេត្ត មិនអាចរកដំណោះស្រាយបានទៀត រូបគេនឹងបន្តមកដល់រាជធានីភ្នំពេញទៀត ។
ម្ចាស់ជ័យលាភីសិស្សឆ្នើមគណិតលេខ១ទូទាំងប្រទេសប្រចាំឆ្នាំ២០១៨ រៀបរាប់ទាំងស្រងូតស្រងាត់ថា «ពិតជាខកបំណងខ្លាំង មិនគួរណាលទ្ធផលបែរជាបែបននេះសោះ ព្រោះរូបគេបានរំពឹងថា នឹងទទួលបាននិទ្ទេសA ក្នុងការប្រឡងមធ្យមសិក្សាទុតិយភូមិនេះ។ គ្រប់មុខវិជ្ជាស្ទើរតែ A ទាំងអស់មាននិទ្ទេស B តែ២មុខវិជ្ជាប៉ុណ្ណោះ។ អ្វីដែលធ្វើឲ្យគេតក់ស្លុត គឺគណិតវិទ្យាដែលខ្លួនបានធ្វើល្អបំផុត បែរជាធ្លាក់ទៅវិញ»។
សូមបញ្ជាក់ថា ឆាយ លីអាន មកវិទ្យាល័យហ៊ុន សែន ឈូក ក៏ធ្លាប់ជាសិស្សឆ្នើមជ័យលាភីលេខ២ លើមុខវិជ្ជាគណិតវិទ្យាក្នុងឆ្នាំ២០១៥ កាលរូបគេរៀនថ្នាក់ទី៩ទៀតផង ។ បន្ថែមពីនេះ យ លីអាន គឺជា សិស្សពូកែមុខវិជ្ជាគណិតវិទ្យា ទូទាំងប្រទេស បានលេខ១ក្នុងឆ្នាំ២០១៨ ។ ជាពិសេសរូបគេធ្លាប់បានទៅប្រកួតនៅប្រទេសសិង្ហបុរី ក្នុងការប្រកួតគណិតវិទ្យាប្រចាំតំបន់អាស៊ាន ប្រកួតការធ្វើ Research នៅប្រទេសម៉ាឡេស៊ី និងប្រកួតលំដាប់ថ្នាក់អន្តរជាតិ (IMO) នៅប្រទេសរ៉ូម៉ាន់នី ដែលមានការចូលរួមពី១១៦ប្រទេសជុំវិញពិភពលោកទៀតផង។
មហាជនជាច្រើន បានដាក់ចម្ងល់ទៅនឹងលទ្ធផលនេះ ហើយក៏ចង់ឱ្យក្រសួងអប់រំ ចេញមុខមកបកស្រាយផងដែរ ៕
