ខេត្តបាត់ដំបង ៖ កាស៊ីណូមួយកន្លែង ដែលមានយីហោ ឃ្វីន ស្ថិតនៅចំកណ្តាលទីប្រជុំជន ដោយមានផ្ទះពលរដ្ឋនៅជាប់ជុំវិញ នៅស្រុកកំរៀង ខេត្តបាត់ដំបង ប្រើប៉ូលីស អោយចាំបើកទ្វារ នឹងការពារឲ្យប្រជាពលរដ្ឋខ្មែរ ចូលលេងយ៉ាងរលូនទាំងយប់ទាំងថ្ងៃ ។
តាមរូបភាពជាក់ស្តែង កាស៊ីណូខាងលើនេះ មានយុវជនខ្មែរគ្រប់សណ្ឋានមិនថាស្រីប្រុសសុទ្ធតែដើរចូលលេងយ៉ាងសប្បាយ មិនភ័យខ្លាចគេចាប់ ដូចលេងនៅក្រៅឡើយ ពោលគឺសុវត្តិភាពមួយរយភាគរយ ដោយសារមានប៉ូលិសស្រាប់ ។
ប្រភពពីប្រជាពលរដ្ឋដែលរស់នៅក្បែរកាស៊ីណូឃ្វីនបាននិយាយថា កាស៊ីណូនេះ កន្លងមកត្រូវបានអាជ្ញាធរបិទម្តងរួចមកហើយ ដោយសារតែមិនមានឯកសារគ្រប់គ្រាន់ តែបិទមិនបានប៉ុន្មានផង ស្រាប់តែចាប់ផ្តើមបើកជាថ្មី ហើយបើកថ្មីវិញនេះ មានអាគារប្រណិតជាមុនទៅទៀត ។ ហើយជារៀងរាល់ថ្ងៃ គេហាក់មិនដែលឃើញ ជនបរទេសណាចូលលេងទេ សូម្បីតែជនជាតិថៃ ដែលមានព្រំដែនជាប់គ្នាក៏មិនឃើញដែរ គឺឃើញតែយុវជនខ្មែរ ចូលលេងយ៉ាងគគ្រឹកគគ្រេងតែប៉ុណ្ណោះ ។
លោកវរសេនីយ៍ឯក គីម ពន្លក អធិការនៃអធិកាដ្ឋាននគរបាលស្រុកកំរៀង បានថ្លែងតាមទូរសព្ទ័ថា កាស៊ីណូនេះមានច្បាប់ត្រឹមត្រូវ ដែលមានថៅកែជាខ្មែរ ហើយក៏មិនអនុញ្ញតិឲ្យពលរដ្ឋខ្មែរចូលលេងដែរ គឺសម្រាប់តែជនបរទេស តែប៉ុណ្ណោះ ។
ជុំវិញបញ្ហាដែលថា មានប៉ូលិសចាំការពារឈរបើកទ្វារ ពាក់អាវរងារ សរសេរអក្សបរទេសថា ប៉ូលិសនោះ លោកអធិការស្រុកកំរៀង បានបញ្ជាក់ថា ចំពោះការដាក់ពង្រាយប៉ូលីសឲ្យឈរបើកទ្វារ នឹងយាមឲ្យខ្មែរចូលលេងនៅទីនោះគឺគ្មានទេ គឺមានតែសន្តិសុខក្រុមហ៊ុនឯកជន ដែលពាក់អាវប៉ូលីស ។ ទោះជាយ៉ាងណា លោកក៏បានអោយមន្ត្រីមានសមត្ថកិច្ចចុះទៅពិនិត្យ និងអោយដោះអាវចេញ រួចហើយដែរ ៕
