ខេត្តព្រះសីហនុ៖ បន្ទាប់ពីជនអន្ធពាលជនជាតិចិនមួយក្រុម បានដកកាំភ្លើងបាញ់ប្រហារទៅលើគូទំនាស់ ហើយរត់គេចខ្លួនអស់រយៈពេលជាង១ខែនោះមក សមត្ថកិច្ចនគរបាលជំនាញបានស្រាវជ្រាវ រហូតឃាត់ខ្លួនជនដៃដល់ចំនួន២នាក់ កាលពីវេលាម៉ោង១០ និង៣០នាទីយប់ ថ្ងៃទី៥ ខែកញ្ញា ឆ្នាំ២០១៨ នៅក្នុងក្រុងព្រះសីហនុ។
មន្ត្រីការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ជនសង័្សយជាប់ពាក់ព័ន្ធនឹងករណីបាញគំរាមជនរងគ្រោះជាជនជាតិចិនដូចគ្នា ហើយត្រូវសមត្ថកិច្ចឃាត់ខ្លួននោះ ទី១-ឈ្មោះ REN HAI JUN ភេទប្រុស អាយុ៤៦ឆ្នាំ ជនជាតិចិន កាន់លិខិតឆ្លងដែនលេខ E01115434 មុខរបរមិនពិតប្រាកដ មានលំនៅមិនពិតប្រាកដ និងទី២-ឈ្មោះ WU HAI ZHU ភេទប្រុស អាយុ៣០ឆ្នាំ ជនជាតិចិន កាន់លិខិតឆ្លងដែនលេខ E92111985 មុខរបរមិនពិតប្រាកដ មានលំនៅមិនពិតប្រាកដ។ នៅក្នុងហេតុការណ៍បង្រ្កាប និងចាប់ខ្លួនជនសង័្សយខាងលើនេះ សមត្ថកិច្ចពាក់ព័ន្ធបានដកហូតវត្ថុតាងមួយចំនួន រួមមាន កាំភ្លើងខ្លី២ដើម ម៉ាក BERETA លេខ G643652 បង់១ មានគ្រាប់ចំនួន២ និងម៉ាក GIOCK19 លេខ WBEN763 បង់១ មានគ្រាប់៣គ្រាប់។
មន្ត្រីនគរបាលដដែល បានបន្តថា រីឯជនរងគ្រោះ នៅក្នុងអំពើបាញ់គំរាមនោះ រួមមាន ទី១-ឈ្មោះ ZHANG KUN ភេទប្រុស អាយុ៣៩ឆ្នាំ ជនជាតិចិន (របួសភ្លៅខាងស្តាំ) ទី២-ឈ្មោះ YANG HUAIHUN ភេទប្រុស អាយុ៤១ឆ្នាំ ជនជាតិចិន (របួសក្បាលជង្គង់ខាងស្តាំ) ទី៣-ឈ្មោះ YANG JUN GING ភេទប្រុស អាយុ២៧ឆ្នាំ ជនជាតិចិន (របួសគល់ភ្លៅស្តាំ និងដើមកំភួនជើងខាងឆ្វេង) និងទី៤-ឈ្មោះ LIU WEIMIN ភេទប្រុស អាយុ៣៣ឆ្នាំ ជនជាតិចិន (របួសភ្លៅខាងស្តាំ)។ ជនរងគ្រោះទាំង៤នាក់ ស្នាក់នៅម្ដុំវិមានខ្សាច់មាស ហើយចូលមកទេសចរណ៍ កាលពីថ្ងៃទី១៤ ខែកក្កដា ឆ្នាំ២០១៨ បច្ចុប្បន្នពួកគេបានវិលត្រឡប់ទៅប្រទេសចិនវិញហើយ។
មន្ត្រីនគរបាលដដែល បានឲ្យដឹងពីហេតុការណ៍បាញ់បោះយ៉ាងអនាធិបតេយ្យរបស់ជនជាតិចិនទំនើងមួយក្រុមខាងលើថា មុនពេលកើតហេតុ មានជនជាតិចិនមួយក្រុមបានចូលទៅផឹកស៊ី នៅក្នុងភោជនីយដ្ឋាន «ស៊ីហ៊ូ» ស្ថិតក្នុងក្រុមទី៩ ភូមិ១ សង្កាត់លេខ៣ ក្រុង-ខេត្តព្រះសីហនុ។ លុះមកដល់វេលាម៉ោង៧ និង៣០នាទីយប់ កាលពីថ្ងៃទី១៦ ខែកក្កដា ឆ្នាំ២០១៨ ស្រាប់តែលេចមុខជនបង្កមិនស្គាល់អត្តសញ្ញាណ២នាក់បានជិះម៉ូតូ១គ្រឿង ម៉ាកស្កុបពី ពណ៌ក្រហម ស្លាកលេខប្រើស្កុតបិទពីលើ ពាក់មួកសុវត្ថិភាព ពណ៌ខ្មៅ និងពាក់អាវរងា ពណ៌ខ្មៅ ដៃវែងទាំងពីរនាក់ មកបំផ្ទុះអាវុធបាញ់គំរាមទៅលើជនរងគ្រោះជាជនជាតិចិន៤នាក់ បណ្តាលឲ្យរបួសជើងទាំង៤នាក់ រួចហើយជនបង្កបានគេចខ្លួនបាត់។
មន្ត្រីនគរបាលដដែល បានបន្តថា បន្ទាប់ពីមានការបំផ្ទុះអាវុធបែបនេះភ្លាម សមត្ថកិច្ចបានចុះទៅពិនិត្យ នៅក្នុងកន្លែងកើតហេតុ ដោយរកឃើញសំបកគ្រាប់ចំនួន៩ និងគ្រាប់មិនទាន់បាញ់ចំនួន១ គ្រាប់។ ក្រោយមក លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានដឹកនាំកម្លាំងនគរបាលព្រហ្មទណ្ឌ ចុះស្រាវជ្រាវស៊ើប និងស៊ើបអង្កេតយ៉ាងយកចិត្តទុកដាក់ រហូតឈានទៅដល់ការបង្ក្រាប និងឃាត់ខ្លួនជនសង្ស័យបានចំនួន២នាក់ កាលពីវេលាម៉ោង១០ និង៣០នាទីយប់ ថ្ងៃទី៥ ខែកញ្ញា ឆ្នាំ២០១៨។
មន្រ្ដីនគរបាលដដែល បានបន្ដថា បន្ទាប់ពីឃាត់ខ្លួននាំទៅសាកសួររួចមក ជនសង្ស័យទាំង២នាក់បានសារភាពថា ពួកគេពិតជាបានប្រើភ្លើងខ្លីចំនួន២ដើមបាញ់ទៅលើជនរងគ្រោះពិតប្រាកដមែន។ ករណីនេះ គឺដោយសារតែពួកគេខឹងនឹងជនរងគ្រោះ ដែលបាននិយាយប្រមាថមើលងាយពួកគេថាជាមនុស្សដើរមិនត្រង់ផ្លូវ ដើរខុសបែបនេះ មិនមែនជាមនុស្សល្អ។ លុះពេលពួកគេទៅផឹក នៅក្នុងក្លឹបមួយកន្លែង នៅតាមផ្លូវឧតុនិយម រហូតស្រវឹង ក៏នឹកឃើញរឿងចាស់ ទើបពួកគេមកបាញ់ជនរងគ្រោះតែម្តង។ ដោយឡែកកាំភ្លើងទាំងនេះ គឺពួកគេបានទិញពីជនមិនស្គាល់អត្តសញ្ញាណ ក្នុង១ដើមតម្លៃ៣៨០០ដុល្លារ។ ប៉ុន្តែក្រោយពេលធ្វើសកម្មភាពរួចហើយ ពួកគេបានយកកាំភ្លើងទៅកប់នៅក្នុងដី ស្ថិតក្នុងក្រុមទី២២ ភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ។
ក្រោយពេលឃាត់ខ្លួនរួច សមត្ថកិច្ចបាននាំខ្លួនជនសង័្សយទាំង២នាក់ទៅកាន់ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅកាន់តុលាការចោទប្រកាន់ តាមផ្លូវច្បាប់៕