រាជធានីភ្នំពេញ ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំ បានលើកឡើងថា និន្ទេស A អាចមានច្រើនជាងឆ្នាំមុន ទោះជាយ៉ាងណាលោកមិនបានបញ្ជាក់ថាមានចំនួនប៉ុន្មានទេ ខណៈឆ្នាំមុន និន្ទេស A មានចំនួន៤២៤នាក់ ។
ការលើកឡើងរបស់លោករដ្ឋមន្ត្រី ក្រោយពីលោកចូលរួមពិធីអបអរនិស្សិត២១នាក់ ដែលទទួលបានអាហារូបករណ៍ ទៅសិក្សានៅអង់គ្លេស កាលពីថ្ងៃទី៤កញ្ញា ។ លោកជឿជាក់ថា ដោយសារសិស្សខំប្រឹងរៀនជាង៥ឆ្នាំមកហើយ ដូច្នេះ និទ្ទេស A ប្រហែលជាច្រើនជាងឆ្នាំមុន ប៉ុន្តែប៉ុន្មាននាក់នោះ លោកមិនទាន់ដឹងទេ ព្រោះអីមិនទាន់(ស្រង់ពិន្ទុ)ចប់នៅឡើយ ។
លទ្ធផលប្រឡងបាក់ឌុប អាចនឹងប្រកាសមុនការកំណត់ ពោលគឺនៅថ្ងៃទី៩ និងទី១០ ខែកញ្ញា នេះវិញ ប្រសិនជាការបូកសរុបពិន្ទុនេះ លឿនជាងការគ្រោងទុក ។
តាមការគ្រោងទុករបស់ក្រសួង លទ្ធផលប្រឡងនឹងត្រូវប្រកាស នៅថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល ។ ចំណែកនៅថ្ងៃទី១២ ខែកញ្ញា សម្រាប់មណ្ឌលប្រឡងតាមបណ្តាខេត្តនានា ។
រដ្ឋមន្ត្រីក្រសួងអប់រំ បានអះអាងថា សមាជិកអនុគណៈកម្មការគ្រប់គ្រងសន្លឹកMCS និងអនុគណៈកម្មការស្រង់បូកពិន្ទុដោយកុំព្យូទ័រ កំពុងមានភាពមមាញឹកក្នុងការបំពេញភារកិច្ចស្រង់-បូក និងពិនិត្យផ្ទៀងផ្ទាត់ពិន្ទុបេក្ខជន ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជាសម្រាប់ឆ្នាំ២០១៨នេះ ។
សូមបញ្ជាក់ថា កាលពីឆ្នាំ២០១៧ កន្លងទៅ មានសិស្សដែលប្រឡងជាប់៦៣,៦៦៨ នាក់ ត្រូវជា៦៣,៨៤ភាគរយ ក្នុងចំណោមបេក្ខជនវត្តមាន ប្រឡង៩៩,៧២៨នាក់ ដោយក្នុងនោះបេក្ខជនជាប់និទ្ទេសA មានចំនួន៤២៤នាក់និទ្ទេសB មានចំនួន២,៤៦៤នាក់ និទ្ទេសC មានចំនួន៥,០០០នាក់ និទ្ទេស D មានចំនួន ៩,១២៣ នាក់និងនិទ្ទេស E មានចំនួន ៤,៦៦៥៧នាក់ ។ សម្រាប់ឆ្នាំ២០១៨ នេះ បេក្ខជនជាង១១ម៉ឺននាក់ បានចុះឈ្មោះប្រឡង និងជាងជិត២,០០០នាក់ បានបោះបង់ការប្រឡង ៕