ភ្នំពេញ៖ រដ្ឋសភាបានត្រៀមលក្ខណៈរួចរាល់ហើយ ដើម្បីបើកសម័យប្រជុំសភាលើកដំបូង នានីតិកាលទី៦ នៅថ្ងៃទី៥ ខែកញ្ញា ឆ្នាំ២០១៨ស្អែកនេះ ក្រោមព្រះរាជាធិបតីដ៏ខ្ពង់ខ្ពស់ នៃព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
លោក ឡេង ប៉េងឡុង អ្នកនាំពាក្យរដ្ឋសភា បានឲ្យដឹងថា យើងបានត្រៀមលក្ខណៈរួចរាល់ហើយ ដោយយើងបានតុបតែងរដ្ឋសភាឲ្យបានស្អាត ដើម្បីទទួលព្រះរាជវត្តមានព្រះករុណា ព្រះមហាក្សត្រ ដ៏ខ្ពង់ខ្ពស់ និងជាទីស្រឡាញ់របស់ប្រជាពលរដ្ឋខ្មែរយើងទាំងអស់គ្នា។ ព្រះមហាក្សត្រទ្រង់សព្វព្រះរាជហឫទ័យ ស្ដេចយាងមកធ្វើជាព្រះរាជាធិបតីភាព នៅក្នុងកិច្ចប្រជុំដំបូងរបស់រដ្ឋសភា នានីតិកាលទី៦នេះ។
ឯកអគ្គរដ្ឋទូតអាមេរិកប្រចាំកម្ពុជាដែលជិតផុតអាណត្តិ លោកWilliam Heidt នឹងមិនបានចូលរួមសម័យប្រជុំដំបូងនៃសភាថ្មីរបស់កម្ពុជានោះទេ។ នេះបើតាមការបញ្ជាក់របស់ស្ថានទូតអាមេរិកប្រចាំនៅទីក្រុងភ្នំពេញ។ បើតាមស្ថានទូតអាមេរិក នេះគឺដោយសារតែលោកឯកអគ្គរដ្ឋទូត William Heidt បានចាកចេញពីប្រទេសកម្ពុជា តាំងពីចុងសប្តាហ៍មុន ដើម្បីទៅចូលរួមការពិគ្រោះយោបល់ នៅរដ្ឋធានីវ៉ាស៊ីនតោន សហរដ្ឋអាមេរិក។
ដោយឡែកលោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅប្រទេសកម្ពុជាវិញ លោកបានបញ្ជាក់តាំងពីមិនទាន់ទទួលបានលិខិតអញ្ជើញពីរដ្ឋសភាកម្ពុជាមកម្ល៉េះថា លោកមិនបានចូលរួមការប្រជុំដំបូង នៃរដ្ឋសភាថ្មីរបស់កម្ពុជានោះទេ។ អវត្តមានរបស់លោកនេះ គឺដោយសារតែលោកត្រូវចេញទៅចូលរួមប្រជុំផ្សេងៗ នៅក្នុងទីក្រុងប្រ៊ុចសែល ប្រទេសប៊ែលហ្ស៊ិក។ ដូច្នេះហើយទើបលោកមិនអាចនៅចូលរួមបាន។ យ៉ាងណាក៏ដោយ ទាំងស្ថានទូតសហភាពអឺរ៉ុប និងអាមេរិកសុទ្ធតែមិនព្រមបញ្ជាក់ទេថា តើពួកគេនឹងមានបញ្ជូនតំណាងទៅចូលរួមជំនួសឬយ៉ាងណានោះទេ។
បើទោះបីឯកអគ្គរដ្ឋទូតទាំងពីរនេះ មិនចូលរួមនៅក្នុងសម័យប្រជុំដំបូង នៃរដ្ឋសភាថ្មីក៏ដោយ ក៏វាមិនប៉ះពាល់ដល់ការប្រជុំនោះដែរ ពីព្រោះនៅពេលនេះ រដ្ឋសភាបានរៀបចំត្រៀមការប្រជុំរួចរាល់អស់ហើយ។ នេះបើតាមការបញ្ជាក់ពីលោកឡេង ប៉េងឡុង ដែលជាអ្នកនាំពាក្យរដ្ឋសភាជាតិកម្ពុជា។ លោកឡេង ប៉េងឡុង ក៏បានបញ្ជាក់ឲ្យដឹងដែរថា មកដល់ពេលនេះ មានអង្គទូតខ្លះបានបញ្ជាក់ពីការចូលរួមហើយ តែលោកនៅតែមិនទាន់អាចសរុបបាននៅឡើយ ថាតើមានអង្គទូតប៉ុន្មានចូលរួម និងប៉ុន្មានទៀតមិនចូលរួមនោះ។
សូមជម្រាបថា រដ្ឋសភានឹងបើកកិច្ចប្រជុំជាលើកដំបូង នានីតិកាលទី៦ នៅព្រឹក ថ្ងៃទី៥ ខែកញ្ញា ឆ្នាំ២០១៨ ក្រោមព្រះរាជាធិបតី នៃព្រះមហាក្សត្រ។ នៅល្ងាច ថ្ងៃទី៥ ខែកញ្ញា សមាជិកនៃរដ្ឋសភា នឹងចូលស្បថកាន់តំណែង។ លុះមកដល់ព្រឹក ថ្ងៃទី៦ ខែកញ្ញា រដ្ឋសភានឹងបង្កើតក្បាលម៉ាស៊ីនរបស់រដ្ឋសភា ក៏ដូចជា បង្កើតរាជរដ្ឋាភិបាលថ្មី។ នៅល្ងាច ថ្ងៃទី៦ ខែកញ្ញា រាជរដ្ឋាភិបាលថ្មីនឹងស្បថចូលកាន់តំណែង។ នៅព្រឹក ថ្ងៃទី៧ ខែកញ្ញា ឆ្នាំ២០១៨ គណៈរដ្ឋមន្ដ្រីនឹងប្រជុំសម័យប្រជុំលើកដំបូងរបស់ខ្លួន។
ប្រវត្តិរដ្ឋសភាកម្ពុជា ចាប់តាំងពីការរកកើត រហូតមកដល់បច្ចុប្បន្ន
ទី១-សភាធម្មនុញ្ញ ឆ្នាំ១៩៤៦-១៩៤៧ ចំនួនគណបក្ស គឺពហុបក្ស ចំនួនអាសនៈ៦៧ កាលបរិច្ឆេទបោះឆ្នោតថ្ងៃទី១ ខែកញ្ញា ឆ្នាំ១៩៤៦
ទី២-រដ្ឋសភា ឆ្នាំ១៩៤៧-១៩៥១ ចំនួនគណបក្ស គឺពហុបក្ស ចំនួនអាសនៈ៧៥ កាលបរិច្ឆេទបោះឆ្នោត ថ្ងៃទី២១ ខែធ្នូ ឆ្នាំ១៩៤៧
ទី៣-រដ្ឋសភា ឆ្នាំ១៩៥១-១៩៥៣ ចំនួនគណបក្ស គឺពហុបក្ស ចំនួនអាសនៈ៧៨ កាលបរិច្ឆេទបោះឆ្នោត ថ្ងៃទី៩ ខែកញ្ញា ឆ្នាំ១៩៥១
ទី៤-រដ្ឋសភា ឆ្នាំ១៩៥៥-១៩៥៨ ចំនួនគណបក្ស គឺបក្សតែមួយ ចំនួនអាសនៈ៩១ កាលបរិច្ឆេទបោះឆ្នោត ថ្ងៃទី១១ ខែកញ្ញា ឆ្នាំ១៩៥៥
ទី៥-រដ្ឋសភា ឆ្នាំ១៩៥៨-១៩៦២ ចំនួនគណបក្ស គឺបក្សតែមួយ ចំនួនអាសនៈ៦១ កាលបរិច្ឆេទបោះឆ្នោត ថ្ងៃទី២៣ ខែកញ្ញា ឆ្នាំ១៩៥៨
ទី៦-រដ្ឋសភា ឆ្នាំ១៩៦២-១៩៦៦ ចំនួនគណបក្ស គឺបក្សតែមួយ ចំនួនអាសនៈ៧៧ កាលបរិច្ឆេទបោះឆ្នោត ថ្ងៃទី១០ ខែមិថុនា ឆ្នាំ១៩៦២
ទី៧-រដ្ឋសភា ឆ្នាំ១៩៦៦-១៩៧២ ចំនួនគណបក្ស គឺបក្សតែមួយ ចំនួនអាសនៈ៨២ កាលបរិច្ឆេទបោះឆ្នោត ថ្ងៃទី១១ ខែកញ្ញា ឆ្នាំ១៩៦៦
ទី៨-សភាជាតិ នៃសាធារណរដ្ឋខ្មែរ ឆ្នាំ១៩៧២-១៩៧៥ ចំនួនគណបក្ស គឺបក្សតែមួយ ចំនួនអាសនៈ១២៦ កាលបរិច្ឆេទបោះឆ្នោត ថ្ងៃទី៣ ខែកញ្ញា ឆ្នាំ១៩៧២
ទី៩-សភាតំណាងប្រជាជន នៃរបបកម្ពុជាប្រជាធិបតេយ្យ ចំនួនគណបក្ស គឺបក្សតែមួយ ចំនួនអាសនៈ២៥០ កាលបរិច្ឆេទបោះឆ្នោតថ្ងៃទី២០ ខែមីនា ឆ្នាំ១៩៧៦
ទី១០-រដ្ឋសភា សាធារណរដ្ឋប្រជាមានិតកម្ពុជា-រដ្ឋកម្ពុជា ឆ្នាំ១៩៨១-១៩៩៣ចំនួនគណបក្ស គឺបក្សតែមួយ ចំនួនអាសនៈ១១៧ កាលបរិច្ឆេទបោះឆ្នោតថ្ងៃទី១ ខែឧសភា ឆ្នាំ១៩៨១
ទី១១-សភាធម្មនុញ្ញ ឆ្នាំ១៩៩៣ ចំនួនគណបក្ស គឺពហុបក្ស ចំនួនអាសនៈ១២០ កាលបរិច្ឆេទបោះឆ្នោតថ្ងៃ២៣-២៨ ខែឧសភា ឆ្នាំ១៩៩៣
ទី១២-រដ្ឋសភានីតិកាលទី១ ឆ្នាំ១៩៩៣-១៩៩៨ ចំនួនគណបក្ស គឺពហុបក្ស ចំនួនអាសនៈ១២០ កាលបរិច្ឆេទបោះឆ្នោត២៣-២៨ ខែឧសភា ឆ្នាំ១៩៩៣
ទី១៣-រដ្ឋសភានីតិកាលទី២ ឆ្នាំ១៩៩៨-២០០៣ ចំនួនគណបក្ស គឺពហុបក្ស ចំនួនអាសនៈ១២២ កាលបរិច្ឆេទបោះឆ្នោតថ្ងៃ២៦ ខែកកក្កដា ឆ្នាំ១៩៩៨
ទី១៤-រដ្ឋសភានីតិកាលទី៣ ឆ្នាំ២០០៣-២០០៨ ចំនួនគណបក្ស គឺពហុបក្ស ចំនួនអាសនៈ១២៣ កាលបរិច្ឆេទបោះឆ្នោតថ្ងៃ២៧ ខែកក្កដា ឆ្នាំ២០០៣
ទី១៥-រដ្ឋសភានីតិកាលទី៤ ឆ្នាំ១៩៩៨-២០០៣ ចំនួនគណបក្ស គឺពហុបក្ស ចំនួនអាសនៈ១២៣ កាលបរិច្ឆេទបោះឆ្នោតថ្ងៃ២៦ ខែកក្កដា ឆ្នាំ២០០៨
ទី១៦-រដ្ឋសភានីតិកាលទី៥ ឆ្នាំ២០១៣-២០១៨ ចំនួនគណបក្ស គឺពហុបក្ស ចំនួនអាសនៈ១២៣ កាលបរិច្ឆេទបោះឆ្នោតថ្ងៃ២៨ ខែក្កដា ឆ្នាំ២០១៣ ៕