ស្ទឹងត្រែង ៖ ស្ពានអូរគុហ៍ នៅក្បែរព្រំដែនកម្ពុជា-ឡាវ ស្ថិតក្នុងស្រុកសៀមប៉ាងបានបាក់ស្រុតអស់មួយកំណាត់ នាវេលាម៉ោង៣រសៀល ថ្ងៃទី១ ខែកញ្ញា ឆ្នាំ២០១៨ ។
មន្ត្រីយោធាប្រចាំការនៅតំបន់ព្រំដែន បានឱ្យដឹងថា ស្ពានអូរគុហ៍ នេះត្រូវបានជំនន់ទឹកភ្លៀង និងជំនន់ទឹកពីទំនប់វារីអគ្គិសនី នៅប្រទេសឡាវ បានវាយប្រហារ ។
ទឹកជំនន់ទន្លេសេកុងជន់ឡើង ហើយស្រក ជាច្រើនលើកច្រើនសារ នាពេលកន្លងមក ដែលជាមូលហេតុ នាំអោយទឹកហូរបុកបាក់ច្រោះដីក្បាលស្ពានខាងកើត បាក់ស្រុតមួយកំណាត់ទាំងស្រុង ។
ស្ពានខាងលើនេះ ទើបនឹងសាងសង់ មិនទាន់មួយឆ្នាំផង ទឹកជំនន់មកបំផ្លាញបាក់ស្រុតគល់ស្ពានបន្តិចម្តង តាំងពីខែមុន រហូតមកដល់ពេលនេះ បាក់ចំពាក់កណ្តាលស្ពានតែម្តង មិនអាចធ្វើចរាចរណ៍ឆ្លងកាត់បានទៀតឡើយ ។
គួរបញ្ជាក់ថា ស្ពានអូរគុហ៍ ព្រំដែនកម្ពុជា-ឡាវ ខាងលើត្រូវបានសាងសង់ឡើងដោយកម្លាំងកងវិស្វកម្ម មិនទាន់បានសម្ពោធដាក់អោយប្រើប្រាស់ផង ត្រូវបានទឹកជំនន់វាយប្រហារជាច្រើនសារ បង្កឱ្យបាក់ស្ពានមួយកំណាត់ ផ្នែកខាងកើតតែម្តង ៕
