ភ្នំពេញ៖ បន្ទាប់ពីចេញពីពន្ធនាគារមិនទាន់បានប៉ុន្មានថ្ងៃផង លោក គឹម សុខ អ្នកវិភាគនយោបាយ និងសង្គមរូបនេះ នៅតែបន្តរិះគន់ដល់រដ្ឋាភិបាលរបស់សម្ដេចនាយករដ្ឋមន្ត្រី នៃប្រទេសកម្ពុជា ក៏ត្រូវបានលោក លាង សំណាត់ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឲ្យលោក គឹម សុខ ចូលខ្លួនទៅកាន់តុលាការ នៅថ្ងៃទី១៤ ខែកញ្ញា ឆ្នាំ២០១៨ ក្រោមការចោទប្រកាន់ ពីបទ «បរិហារកេរ្តិ៍ជាសាធារណៈ និងញុុះញង់ឲ្យប្រព្រឹត្តបទឧក្រិដ្ឋជាអាទិ៍»។
លោក គឹម សុខ អ្នកវិភាគសង្គម និងនយោបាយដ៏ល្បីល្បាញមួយរូប ទើបតែត្រូវបានតុលាការរាជធានីភ្នំពេញ ដោះលែងឲ្យមានសេរីភាពឡើងវិញ កាលពីថ្ងៃទី១៧ ខែសីហា ឆ្នាំ២០១៨ កន្លងមក ប៉ុន្តែរហូតមកដល់ថ្ងៃទី២៨ ខែសីហា ឆ្នាំ២០១៨ លោកត្រូវបានលោក លាង សំណាក់ ចៅក្រមស៊ើបសួរ នៃសាលាដំបូងរាជធានីភ្នំពេញ ចេញដីកាបង្គាប់ឲ្យចូលខ្លួនទៅបំភ្លឺ នៅមុខតុលាការ នៅថ្ងៃទី១៤ ខែកញ្ញា ខាងមុខនេះ ក្រោមការចោទប្រកាន់ពីបទ “បរិហារកេរ្ដិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍”។
យោងតាមដីកាបង្គាប់ឲ្យចូលខ្លួនរបស់តុលាការ បានបញ្ជាក់យ៉ាងដូច្នេះថា «បង្គាប់មកឈ្មោះ គឹម សុខ ភេទប្រុស អាយុ៣៨ឆ្នាំ កើតថ្ងៃទី១៣ ខែតុលា ឆ្នាំ១៩៨០ ជនជាតិខ្មែរ មានអាសយដ្ឋានបច្ចុប្បន្ន ស្នាក់នៅផ្ទះជួល សង្កាត់វត្តភ្នំពេញ ខណ្ឌដូនពេញ រាជធានីភ្នំពេញ (អាសយដ្ឋានចុងក្រោយ) ឲ្យចូលខ្លួនមកកាន់សាលាដំបូងរាជធានីភ្នំពេញ បន្ទប់ «ឈ» ជាន់ទី៤ ថ្ងៃទី១៤ ខែកញ្ញា ឆ្នាំ២០១៨ វេលាម៉ោង០៨៖៣០នាទីព្រឹក ដើម្បី៖ មកសាកសួរយកចម្លើយពីដំណើររឿង បរិហារកេរ្ដិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
លោកឧត្តមសេនីយ៍ឯក អ៊ី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ បានប្រាប់អ្នកកាសែតថា លោក គឹម សុខ ពិតជាបានរត់គេចខ្លួនទៅដល់ប្រទេសថៃហើយ ដោយចេញតាមច្រករបៀង។ នៅពេលនេះ សមត្ថកិច្ចកម្ពុជារបស់យើងកំពុងសហការជាមួយជាមួយសមត្ថកិច្ចរបស់ថៃ ដើម្បីតាមស្វែងរកលោក គឹម សុខ។
លោក លាង សំណាក់ បានបញ្ជាក់ថា លោក គឹម សុខ ជាប់បទចោទ«បរិហាកេរ្តិ៍ជាសាធារណៈ និងញុងញង់ឲ្យប្រព្រឹត្តបទឧក្រិដ្ឋជាអាទិ៍» ដែលបានប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០១៧ តាមបញ្ញត្តិមាត្រា៣០៥ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។ ក្នុងករណីលោក គឹម សុខ មិនចូលខ្លួនតាមការកំណត់ខាងលើទេ តុលាការនឹងចេញដីកាបង្គាប់ឲ្យនាំខ្លួន។ នេះបើតាមលិខិតតុលាការ ចុះថ្ងៃទី២៨ ខែសីហា ឆ្នាំ២០១៨។
លោក គឹម សុខ ត្រូវបានតុលាការដោះលែងឲ្យមានសេរីភាពឡើងវិញ កាលពីថ្ងៃទី១៧ ខែសីហា ឆ្នាំ២០១៨ បន្ទាប់ពីអនុវត្តទោសចប់សព្វគ្រប់ ពោលបានជាប់ពន្ធនាគារ អស់រយៈពេលប្រមាណ១៨ខែ។ លោក គឹម សុខ កាលពីថ្ងៃទី១០ ខែសីហា ឆ្នាំ២០១៧កន្លងទៅ ត្រូវបានចៅក្រមជំនុំជម្រះ នៃសាលាដំបូងរាជធានីភ្នំពេញ លោក គី ប្ញទ្ធី បានសម្រេចផ្ដន្ទាទោសដាក់ពន្ធនាគារចំនួន១៨ខែ និងពិន័យប្រាក់ចំនួន៨លានរៀល រួមនឹងប្រាក់សងជំងឺចិត្តដល់ដើមបណ្តឹង ៨០០លានរៀល ក្រោមការចោទប្រកាន់ពីបទ “ញុះញង់ឲ្យមានបទឧក្រិដ្ឋជាអាទិ៍” ។
ការផ្តន្ទាទោសនេះ ធ្វើឡើងតាមបណ្តឹងរបស់គណបក្សប្រជាជនកម្ពុជា បន្ទាប់ពីលោក គឹម សុខ បានញុះញង់ និងបរិហារកេរ្តិ៍គណបក្សប្រជាជនកម្ពុជាថា នៅពីក្រោយឃាតកម្មលោកបណ្ឌិត កែម ឡី អ្នកវិភាគសង្គម និងនយោបាយដ៏ល្បីល្បាញមួយរូបនៅកម្ពុជា។
កាលពីថ្ងៃទី២៩ ខែសីហា ឆ្នាំ២០១៨កន្លងទៅថ្មីៗនេះ ប្រមុខនៃរាជរដ្ឋាភិបាលកម្ពុជា សម្ដេចតេជោ ហ៊ុន សែន បានព្រមានខ្លាំងៗថា សម្ដេចនឹងប្ដឹងអ្នកវិភាគសង្គម លោក គឹម សុខ ដាក់ពន្ធនាគារវិញ ប្រសិនជាមិនសងប្រាក់សំណង ៨០០លានរៀល ស្មើនឹងប្រមាណ២០ម៉ឺនដុល្លារមកឲ្យគណបក្សប្រជាជនកម្ពុជា ទេនោះ។ មូលហេតុដែលប្រមុខរដ្ឋាភិបាល រំឭកពីប្រាក់សំណងនេះ ដោយសារតែអតីតទណ្ឌិត ទើបចេញពីពន្ធនាគាររូបនេះ បានប្រើប្រាស់ពាក្យពេចន៍លើសលស់មកលើរដ្ឋាភិបាល។ សម្ដេច ហ៊ុន សែន បានចាត់ទុកពាក្យសម្ដីរបស់បុគ្គលរូបនេះ គឺជាការប្រមាថដល់ខ្លួន។
ទោះជាយ៉ាងណាលោក គឹម សុខ ត្រូវបានគេដឹងថា បានគេចខ្លួនពីកម្ពុជា ទៅក្រៅប្រទេសហើយ កាលពីពេលថ្មីៗនេះ៕
សូូមអានដីកាបង្គាប់ឲ្យចូលខ្លួនទាំងស្រុងដូចខាងក្រោម៖
