បរទេស៖ បន្ទាប់ពីមើលឃើញអត្រាប្រជាពលរដ្ឋរបស់ខ្លួនធ្លាក់ចុះយ៉ាងខ្លាំងនោះមក ធ្វើឲ្យអាជ្ញាធរ នៃប្រទេសចិនមានការព្រួយបារម្ភយ៉ាងខ្លាំង ហើយកំពុងតែត្រៀមរៀបចំសេចក្តីព្រាងច្បាប់ នៃក្រមរដ្ឋប្បវេណីរបស់ខ្លួនលែងកំណត់ចំនួនកូន ដោយគូស្វាមីភរិយារបស់ជនជាតិចិនមានសិទ្ធិបង្កើតតាមតែពួកគេចង់បាន
បើយោងតាមសារព័ត៌មានផ្លូវការរបស់ចិនបានចេញផ្សាយ កាលពីថ្ងៃចន្ទ ទី២៧ ខែសីហា ឆ្នាំ២០១៨ ម្សិលមិញនេះ បានឲ្យដឹងថា អាជ្ញាធរ នៃរដ្ឋបាលក្រុងប៉េកាំងកំពុងត្រៀមខ្លួនលុបចោលទាំងស្រុងនូវផែនការគ្រួសារ តាមគន្លងនយោបាយ “គ្រួសារកូនមួយ” ដែលចិនបានអនុវត្តយ៉ាងតឹងតែងបំផុត ចាប់តាំងពីឆ្នាំ១៩៧៩ រហូតមកដល់ឆ្នាំ២០១៥កន្លងទៅនេះ។
ប្រឈមនឹងភាពចាស់ជរារបស់ប្រជាជន ចិនបានប្រកាសបោះបង់ចោលនយោបាយ “កូនតែមួយ” នៅចុងឆ្នាំ២០១៥។ តាំងពីពេលនោះមក គូស្វាមីភរិយាចិន អាចមានកូនទីពីរ តែមិនអាចមានច្រើនលើសពីពីរនាក់បានឡើយ !
ប៉ុន្តែនៅថ្ងៃនេះ ចិនបាននិងកំពុងរៀបចំគម្រោងច្បាប់ថ្មី ដែលលែងមានចែងទាល់សោះអំពីការកំរិតចំនួនកូន និងបម្រាមអ្វីទាំងអស់។ ច្បាប់នេះនឹងត្រូវអនុម័តនៅ ឆ្នាំ២០២០ ដោយអង្គសមាជសភាប្រជាជនដែលជាអ្នកគ្រប់គ្រងច្បាប់រដ្ឋប្បវេណីចិន។
ប្រទេសបក្សកុម្មុយនិស្តចិន បានចេញគោលការណ៍ “កូនតែមួយ” នៅឆ្នាំ១៩៧៩ ដើម្បីទប់ស្កាត់នូវកំណើនប្រជាជន ដោយមិនខ្លាចនឹងការចាប់បង្ខំប្រជាជនឱ្យរម្លូតកូន ឱ្យប្រើវិធីពន្យារកំណើត ឱ្យបង់ពិន័យ ឱ្យជាប់ពន្ធនាគារទេ … ។ ទោះជានយោបាយត្រួតពិនិត្យកំណើតដ៏តឹងតែងនេះ បានរងការរិះគន់យ៉ាងខ្លាំងក្ដី ប៉ុន្តែប្រទេសចិនបានបង្កឱ្យវិសមភាពជាច្រើន ដូចជា កំណើនមនុស្សចាស់ និងកង្វះមនុស្សភេទស្រី ដោយសារជនជាតិចិនប្រកាន់យកបិតាធិបតេយ្យ (យកខាងប្រុសជាធំ) ទើបពួកគេចូលចិត្តតែកូនប្រុស។
មុនពេលមានការប្តូរផ្លាស់នយោបាយ នាឆ្នាំ២០១៥នោះ ប្រទេសចិនបានផ្តល់សិទ្ធិ ជាករណីលើកលែងឱ្យស្ត្រីចំនួន៥០លាននាក់ បង្កើតកូនពីរ ក្រោមមូលហេតុជាជនភាគតិច ជាអ្នកជនបទ មានកូនទីមួយភេទស្រី ខ្លួនឯង ឬស្វាមីជាកូនទោលស្រាប់។ ប៉ុន្តែច្បាប់នេះមិនបានផ្តល់ផ្លែផ្កាទេ ហើយអត្រាកំណើតក៏ នៅតែធ្លាក់ចុះយ៉ាងខ្លាំង នៅឆ្នាំ២០១៧ ព្រោះគូស្វាមីភរិយាជនជាតិចិន មិនចង់បង្កើតកូនទីពីរ ដោយសារខ្លាចត្រូវបាត់បង់ការងារ ដោយបញ្ហាថវិកា ផ្ទះសម្បែងថ្លៃ និងត្រូវបង់ថ្លៃសិក្សាអស់ច្រើន។
នៅពេលបច្ចុប្បន្ននេះ កំណើនមនុស្សចាស់កំពុងតែក្លាយជាវិបត្តិប្រជាសាស្ត្រ ពីព្រោះចំនួនពលរដ្ឋចិនសកម្ម (អាយុ១៦-៥៩ឆ្នាំ) បានថយចុះជិត៥លាននាក់កន្លះ កាលពីឆ្នាំទៅ និងជាគម្រប់៦ឆ្នាំជាប់ៗគ្នា មកនៅត្រឹមតែ៩០២លាននាក់ ឬស្មើនឹង៥% នៃប្រជាជនសរុប។
រដ្ឋាភិបាលចិនបានប៉ាន់ស្មានថា ចំនួនប្រជាជនវ័យចំណាស់ ចាប់ពីអាយុ៦០ឆ្នាំឡើងទៅ និឹងកើនឡើងដល់ទៅ៤៨៧លាននាក់ នៅក្នុងឆ្នាំ២០៥០ ឬស្មើនឹង៣៥% នៃប្រជាជនសរុប ទល់នឹង២៤១លាននាក់ (១៧%)នៅឆ្នាំ២០១៧៕