ភ្នំពេញ៖ ក្រោយពីបានបង្ហាញខ្លួននៅក្នុងពិធីបើកសម្ពោធជាផ្លូវការផលិតផលគ្រឿងសំណង់ថ្មីម៉ាក MC នាំចូល និងចែកចាយផ្ដាច់មុខពីប្រទេសម៉ាឡេស៊ីដោយក្រុមហ៊ុន ហ៊ួត ជា កញ្ញា កុល ដាវី ដែលមហាជនស្គាល់ច្បាស់ថា ជាគូស្នេហ៍ចាស់វស្សារបស់លោក សុខ រក្សា ត្រូវបានសារព័ត៌មានធំក្នុងស្រុកមួយចុះផ្សាយ ព្រមទាំងបានសរសេរចំណងជើងថា «កុល ដាវី ទាក់ទងថៅកែ តើសុខរក្សាមានអារម្មណ៍យ៉ាងណា?» ។
យ៉ាងណាមិញ សម្រាប់ព័ត៌មានខាងលើនេះ គ្រាន់តែអ្នកព័ត៌មានដាក់ចំណងជើងដើម្បីទាក់ទាញចំណាប់អារម្មណ៍ប៉ុណ្ណោះ ប៉ុន្តែផ្ទុយទៅវិញ គឺបានធ្វើឱ្យមហាជនយល់ច្រឡំ និងធ្វើឱ្យប៉ះពាល់ដល់កិត្តិយសរបស់ កុល ដាវី និងលោក ថៅកែ ដែលផ្ដោតទៅលើលោក ហួត ជា នោះតែម្ដង ។
ទាក់ទងជាមួយគ្នានេះ ក្រោយពេលព័ត៌មានខាងលើ ត្រូវបានចរាចរណ៍លើបណ្ដាញសង្គមហ្វេសប៊ុកហើយនោះ ហាក់ដូចជាបានបញ្ឆេះឱ្យលោក ហួត ជា ក្ដៅស្លឹកត្រជៀកយ៉ាងខ្លាំង ហើយក៏បានព្រលយប្រយោគមួយឃ្លាថា «Hmm សូមខាងព័ត៍មានមេត្តា ដាក់ចំណងជេីងឱ្យល្អបន្តិចទៅ ពួកខ្ញុំ ដូចបុគ្គលិកផង ដូចបងប្អូនផង រាប់ឆ្នាំហេីយ ខ្ញុំរាប់អានគ្នាក្នុងន័យល្អទេ សូមសម្ភាសន៍ ខ្ញុំ ឬ កុលដាវីបន្តិចផងមុននឹងចុះអ៊ីចឹង ។ បេីអាចលុបវិញ កុំដោយសារតែចង់បានគេមេីលច្រេីន» ។
ក្នុងនោះដែរ កញ្ញា កុល ដាវី ផ្ទាល់ក៏បានចេញមុខមកអរគុណលោក ហួត ជា ដែលបានការពារកិត្តិយសកញ្ញា ព្រមទាំងបានសរសេរ Comment បែបកំប្លែងនៅពីក្រោមការបង្ហោះរបស់លោក ហួត ជា ថា «សំណាងហើយសោរ(សំដៅលើភរិយារបស់លោក ហួត ជា) ស្គាល់ខ្ញុំច្បាស់ កុំអីវីរវរហើយ» ។
សូមបញ្ជាក់ថា កញ្ញា កុល ដាវី បានក្លាយជាតំណាងផ្សាយពាណិជ្ជកម្មឱ្យក្រុមហ៊ុនលក់គ្រឿងសំណង់ ហួត ជា ជិត ១០ឆ្នាំមកហើយ ហើយកញ្ញា ក៏បានធ្វើឱ្យឈ្មោះក្រុមហ៊ុនមួយនេះមានភាពល្បីល្បាញ និងរកប្រាក់ចំណូលបានរាប់លានដុល្លារ នេះបើយោងតាមការលើកឡើងរបស់លោក ហួត ជា ផ្ទាល់នៅក្នុងឱកាសបើកសម្ពោធជាផ្លូវការផលិតផលគ្រឿងសំណង់ថ្មីម៉ាក MC របស់ក្រុមហ៊ុន ហួត ជា កាលពីព្រឹក ថ្ងៃទី ១៨ ខែសីហា កន្លងទៅថ្មីៗនេះ ៕
