ភ្នំពេញ៖ បន្ទាប់ពីសម្ដេចតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា បានព្រមានទៅមន្ត្រីជាន់ខ្ពស់ នៃអតីតបក្សសង្រ្គោះជាតិ ថា ការដោះលែងអ្នកទោសនេះ គឺមិនមែនជាសម្ពាធរបស់បរទេសនោះក្ដី ប៉ុន្តែលោក សម រង្ស៊ី អតីតមេបក្សសង្រ្គោះជាតិដែលកំពុងនិរទេស នៅបរទេស នៅតែហៅថា ការដោះលែងអ្នកទោសនេះ គឺមកពីសម្ដេចតេជោ រងនូវសម្ពាធពីបរទេសដដែល។
នៅក្នុងវេទិកាសំណេះសំណាលជាមួយក្រុមកម្មករប្រហែលជិត២ម៉ឺននាក់ នៅក្នុងខេត្តកណ្តាល កាលពីព្រឹក ថ្ងៃព្រហស្បតិ៍ ទី២៣ ខែសីហា ឆ្នាំ២០១៨ សម្ដេចតេជោ ហ៊ុន សែន នាយករដ្ឋមន្ត្រី បានប្រកាសឲ្យដឹងពីគម្រោងស្នើសុំលើកលែងទោសទ្រង់ទ្រាយធំ នៅក្នុងឆ្នាំនេះ។ ក្នុងនោះ សម្ដេចចង់ស្នើឲ្យដោះលែងមនុស្ស១២នាក់ ដែលទំនងជាសម្ដេចចង់សំដៅទៅលើសកម្មជនរបស់អតីតបក្សសង្គ្រោះជាតិ នៅក្នុងរដូវភ្ជុំបិណ្ឌខាងមុខនេះ។ ប៉ុន្តែសម្ដេចក៏មានលក្ខខណ្ឌមួយ គឺមិនឲ្យអ្នកណានិយាយថា ការស្នើនេះធ្វើឡើង ដោយសារតែមានការគាបសង្កត់ពីសហគមន៍អន្តរជាតិនោះឡើយ។
ទោះជាយ៉ាងណា សម្ដេចនាយករដ្ឋមន្ត្រី បានដាក់លក្ខខណ្ឌមួយទៅកាន់មន្ត្រីអតីតបក្សប្រឆាំងទាំងអស់ថា កុំនិយាយថា គម្រោងស្នើលើកលែងទោសនេះ កើតចេញពីការគាបសង្កត់ពីសហគមន៍អន្តរជាតិឲ្យសោះ។ សម្ដេចបានបញ្ជាក់ថា ខ្ញុំស្អប់ពាក្យនេះខ្លាំងណាស់ ហើយថែមទាំងព្រមាន ពួកគេទាំងនោះ ជាពិសេសលោក សម រង្ស៊ី តែម្តងឲ្យមានការប្រុងប្រយ័ត្ន ចំពោះការប្រើប្រាស់ពាក្យទាំងអស់នេះមកលើសម្ដេច។ ប្រសិនមានអ្នកណាមួយហ៊ានធ្វើអត្ថាធិប្បាយថា ការស្នើលើកលែងទោសរបស់សម្ដេច បណ្តាលមកពីសម្ពាធពីបរទេសនោះ សម្ដេចនឹងមិនទាន់ស្នើសុំលើកលែងទោសនោះទេ។ ពោលគឺសម្ដេចនឹងទុកពេលឲ្យអ្នកកំពុងជាប់ឃុំទាំង១២នាក់ ធ្វើលិខិតថ្កោលទោសដល់អ្នកហ៊ាននិយាយបែបនេះជាមុនសិន ទើបសម្ដេចព្រមស្នើលើកលែងទោសដល់ពួកគេ។
សម្ដេចនាយករដ្ឋមន្ត្រី ហ៊ុន សែន បានគូសបញ្ជាក់ម្តងជាពីរដងថា គម្រោងស្នើសុំលើកលែងទោសនេះ មិនជាប់ពាក់ព័ន្ធនឹងសហគមន៍អន្តរជាតិណាមួយឡើយ។ ផ្ទុយទៅវិញ វាគឺជាបំណងដែលកើតចេញពីចិត្តធម៌របស់លោក ចំពោះប្រជាពលរដ្ឋខ្មែរ ដើម្បីឲ្យពួកគេបានទៅជួបជុំក្រុមគ្រួសារឡើងវិញ។ ដោយឡែកមនុស្សទាំង១២នាក់នោះ គឺបានសរសេរលិខិតសុំទោសរូបលោករួចរាល់ហើយ។
ថ្វីបើសម្ដេចនាយករដ្ឋមន្ត្រី មិនបានបញ្ចេញឈ្មោះមនុស្សទាំង១២នាក់នោះក្ដី តែគេអាចកាត់យល់ថាសម្ដេចទំនងជាចង់និយាយសំដៅទៅលើសកម្មជនអតីតបក្សសង្គ្រោះជាតិ។ សកម្មជនអតីតគណបក្សប្រឆាំងទាំងនេះ ត្រូវបានតុលាការរាជធានីភ្នំពេញ ផ្ដន្ទាទោសដាក់ពន្ធនាគារ ចន្លោះពី៧ឆ្នាំទៅ ២០ឆ្នាំ ក្រោមការចោទប្រកាន់ពីបទចូលរួម និងដឹកនាំកុបកម្មរំដោះទីលានប្រជាធិបតេយ្យ ដែលបានធ្វើឡើង កាលថ្ងៃទី១៥ ខែកក្កដា ឆ្នាំ២០១៤កន្លងទៅ។
ការប្រកាសឲ្យដឹងពីគម្រោងស្នើលើកលែងទោសដល់មនុស្ស១២នាក់ ពីសំណាក់សម្ដេចនាយករដ្ឋមន្ត្រីកម្ពុជា កាលពីថ្ងៃទី២៣ ខែសីហា នោះ គឺកើតឡើង ក្រោយពេលសម្ដេចបានជួបផ្ទាល់ជាមួយលោក Mark Field អនុរដ្ឋមន្ត្រីទទួលបន្ទុកកិច្ចការអាស៊ី និងប៉ាស៊ីហ្វិក នៃក្រសួងការបរទេសអង់គ្លេស កាលពីថ្ងៃទី២២ ខែសីហា ឆ្នាំ២០១៨ នៅក្នុងវិមានសន្ដិភាព នារាជធានីភ្នំពេញ។
ក្រោយពេលសម្ដេចតេជោ ហ៊ុន សែន ថ្លែងមិនបានប៉ុន្មានម៉ោងផង ស្រាប់តែលោក សម រង្ស៊ី អតីតប្រធានគណបក្សសង្រ្គោះជាតិ ដែលកំពុងតែនិរទេស នៅឯបរទេស ដោយសារការគេចខ្លួនពីសំណុំរឿងជាច្រើន បានសរសេរនៅលើបណ្ដាញសង្គមហ្វេសប៊ុករបស់លោក កាលពីយប់ ថ្ងៃទី២៣ ខែសីហា ឆ្នាំ២០១៨ ថា ដោយសារតែលោក ហ៊ុន សែន ទាល់ច្រក ក្រោយពីការបោះឆ្នោតក្លែងក្លាយ ថ្ងៃទី២៩ ខែកក្កដា ឆ្នាំ២០១៨កន្លងទៅនេះ ហើយដោយសារតែសម្ពាធពីសហគមន៍អន្តរជាតិ ដែលដកភាពស្របច្បាប់ពីរដ្ឋាភិបាលរបស់គាត់ ហើយត្រៀមដាក់ទណ្ឌកម្ម កាន់តែខ្លាំងឡើងៗ មកលើរបបផ្តាច់ការរបស់គាត់ លោក ហ៊ុន សែន ត្រូវបង្ខំចិត្តដោះលែងអ្នកទោសនយោបាយទាំងអស់ ក្នុងពេលឆាប់ៗខាងមុខនេះ។
លោក សម រង្ស៊ី បានសរសេរ នៅលើគណនីរបស់ខ្លួនបន្តទៀតថា ខ្ញុំសូមប្រាប់ទៅលោក ហ៊ុន សែន វិញថា ការដោះលែងអ្នកទោសនយោបាយទាំងអស់ ជាបន្ទាន់ និងដោយឥតលក្ខខណ្ឌ គ្រាន់តែជាលក្ខខណ្ឌចាំបាច់មួយ តែមិនមែនជាលក្ខខណ្ឌគ្រប់គ្រាន់ទេ ដើម្បីឲ្យគាត់សង្ឃឹមថា សហគមន៍អន្តរជាតិ នៅតែនិយាយរកគាត់ទៀត។ ក្នុងចំណោមលក្ខខណ្ឌដទៃទៀត ដែលលោក ហ៊ុន សែន ត្រូវបំពេញថែមទៀត មានការអនុញ្ញាតឲ្យគណបក្សសង្គ្រោះជាតិដំណើរការឡើងវិញ ការអនុញ្ញាតឲ្យថ្នាក់ដឹកនាំគណបក្សសង្គ្រោះជាតិទាង១១៨រូប មានសិទ្ធិធ្វើសកម្មភាពនយោបាយពេញលេញដូចមុន និងការផ្តល់តំណែងជាសមាជិកក្រុមប្រឹក្សាឃុំ-សង្កាត់ ទៅឲ្យសកម្មជនគណបក្សសង្គ្រោះជាតិ ចំនួន៥០០៧រូប ដែលបានជាប់ឆ្នោត ក្នុងការបោះឆ្នោតឃុំ-សង្កាត់ ខែមិថុនា ២០១៧ ព្រមទាំងការទម្លាក់ចោលនូវរាល់ការចោទប្រកាន់ចំពោះមន្ត្រីគណបក្សប្រឆាំងទាំងអស់ និងមន្ត្រីសង្គមសុីវិលទាំងអស់ ដែលលោក ហ៊ុន សែន និងតុលាការអាយ៉ងរបស់គាត់ បានរករឿង ធ្វើទុក្ខបុកម្នេញ ដោយហេតុផលនយោបាយ៕