រាជធានីភ្នំពេញ ៖ ប្រភពពីមន្ត្រីពន្ធនាគារបានឲ្យដឹងនៅថ្ងៃទី២៣ សីហា ២០១៨នេះថា លោកយោធាស័ក្តិ៤កន្លះម្នាក់ ដែលយកកាំភ្លើងខ្លី វាយក្បាលអ្នកលក់ប្រហិតចៀន នៅខណ្ឌសែនសុខ ត្រូវលោក រស់ ពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ សម្រេចដោះលែងឲ្យនៅក្រៅពន្ធនាគារ ជាបណ្តោះអាសន្នហើយ ។
ប្រភពដដែលបញ្ជាក់ថា លោកចៅក្រមបានចេញដីកា បង្គាប់ឲ្យមន្ត្រីពន្ធនាគារដោះលែងជនត្រូវចោទឈ្មោះ នួន ប៉ូ ភេទប្រុស អាយុ៤៩ឆ្នាំ ជាយោធាពាក់ស័ក្តិ៤កន្លះ មានតួនាទីនាយរងការិយាល័យហ្វឹកហ្វឺន នៃកងឯកភាព ទីចាត់ការបំភ័ន្តអក្ខរ មានអត្តលេខ០៥៩០៥១ កាលពីថ្ងៃទី២០ ខែសីហា ឆ្នាំ២០១៨ ពោលគឺជាប់ឃុំបានតែ១៣ថ្ងៃប៉ុណ្ណោះ ។
សូមជម្រាបជូនថា លោកចៅក្រម រស់ ពិសិដ្ឋ បានចេញដីកាបង្គាប់ឲ្យឃុំខ្លួនមន្ត្រីយោធាជាប់ចោទខាងលើនេះ កាលពីរសៀលថ្ងៃទី០៧ ខែសីហា ឆ្នាំ២០១៨ បន្ទាប់ពីលោកស្រី ស៊ឺ វណ្ណនី ជាតំណាងអយ្យការបើកការស៊ើបសួរ និងចោទប្រកាន់ពីបទហិង្សាដោយចេតនាមានស្ថានទម្ងន់ទោស ប្រព្រឹត្តលើជនរងគ្រោះឈ្មោះ យ៉ែម វណ្ណៈ ភេទប្រុស អាយុ២៧ឆ្នាំ ជាអ្នកលក់ប្រហិតចៀនតាមរទេះ ស្នាក់នៅផ្ទះជួល ភូមិគោកឃ្លាង សង្កាត់គោកឃ្លាង ខណ្ឌសែនសុខ មានស្រុកកំណើត ភូមិកំពង់លាវ ឃុំកំពង់លាវ ស្រុកកំពង់លាវ ខេត្តព្រៃវែង យោងតាមមាត្រា២១៨ នៃក្រមព្រហ្មទណ្ឌ ។ យោងតាមបទចោទប្រកាន់នេះ ជនត្រូវចោទ អាចប្រឈមការជាប់គុក ពី២ឆ្នាំ ទៅ៥ឆ្នាំ ។
គួររំលឹកថា សមត្ថកិច្ចខណ្ឌសែនសុខ បានឃាត់ខ្លួនជនសង្ស័យ កាលពីយប់ថ្ងៃទី០២ ខែសីហា ឆ្នាំ២០១៨ បន្ទាប់ពីជនសង្ស័យ យកអាវុធខ្លី ម៉ាក P08 លេខ ៥៨៥៤ វាយក្បាល ជនរងគ្រោះបែក ។
មូលហេតុដែលឈានដល់ ការប្រើអំពើហិង្សា នេះផ្តើមចេញពីគ្រោះថ្នាក់ចរាចរណ៍ ដោយសារមិត្តភក្តិរបស់ជនសង្ស័យ បើកបររថយន្តម៉ាកកាមេរីបាឡែន ក្រោមស្ថានភាពស្រវឹង ទៅបុករ៉ឺម៉កប្រហិតរបស់ជនរងគ្រោះ ដែលកើតឡើងនៅចំណុចមុខវត្តសំរោងអណ្តែត តាមផ្លូវបេតុង ភូមិរោងចក្រ១ សង្កាត់គោកឃ្លាង ខណ្ឌសែនសុខ ។ បន្ទាប់មក ជនសង្ស័យបានជិះរថយន្តម៉ាកព្រូស មកជួយអន្តរាគមន៍ ក៏ត្រូវជនរងគ្រោះ យកដុំថ្មគប់បែកកញ្ចក់រថយន្ត ទើបឈានដល់ការបង្កហិង្សាលើជនរងគ្រោះតែម្តងទៅ ៕