ភ្នំពេញ៖ បន្ទាប់ពីបើកសវនាការពេញមួយព្រឹក ថ្ងៃទី២២ ខែសីហា ឆ្នាំ២០១៨នេះរួចមក តុលាការកំពូល បានប្រកាសសាលដីកា សម្រេចបន្ដឃុំខ្លួន លោក កឹម សុខា ដាក់ពន្ធនាគារដដែល ដោយតម្កល់សាលដីការបស់សាលាឧទ្ធរណ៍ទុកជាបានការដដែល។
តុលាការកំពូល នៅព្រឹកថ្ងៃទី២២ ខែសីហា ឆ្នាំ២០១៨នេះ បានបន្តបើកសវនាជំនុំជម្រះលើបណ្តឹងសុំនៅក្រៅឃុំ ជាលើកទី២របស់លោក កឹម សុខា អតីតប្រធានគណបក្សសង្គ្រោះជាតិ ដោយមានតែវត្តមានមេធាវីការពារក្តី តែគ្មានវត្តមានរបស់លោក កឹម សុខា ឡើយ។
បើតាមអង្គសេចក្តី នៃសវនាការនេះ គឺធ្វើឡើង ដោយសារមេធាវីរបស់លោក កឹម សុខា មិនសុខចិត្តនឹងសេចក្តីសម្រេចរបស់តុលាការកំពូល កាលថ្ងៃទី០៩ ខែមីនា ឆ្នាំ២០១៨ ដោយបានសម្រេចតម្កល់សាលដីកាសាលាឧទ្ធរណ៍ទុកជាបានការ និងងតម្រូវឲ្យបន្តឃុំខ្លួនលោក កឹម សុខា ដាក់នៅក្នុងពន្ធនាគារបន្តទៀត ដើម្បីសាកសួរ និងការពារកុំឲ្យមានបទល្មើសថ្មីកើតឡើង។ ការសម្រេចរបស់តុលាការកំពូលនេះ គឺសំអាងលើហេតុថា ករណីលោក កឹម សុខា គឺជាប់ពាក់ព័ន្ធនឹងបទល្មើសឧក្រិដ្ឋ ដែលចាំបាច់ត្រូវឃុំខ្លួន ដើម្បីស៊ើបសួរឲ្យបានហ្មត់ចត់។
លោក ឃឹម ប៉ុណ្ណ ប្រធានចៅក្រុមជំនុំជម្រះ ធ្លាប់បានប្រកាស ក្នុងសម្រង់ន័យដើម ដោយយោងលើមូលហេតុថា៖ «លោក កឹម សុខា បានប្រព្រឹត្តបទល្មើស សន្ទិដ្ឋភាពជាមួយបរទេស ចាប់តាំងពីឆ្នាំ១៩៩៣ ដល់ឆ្នាំ២០១៧។ បទល្មើសនេះជាបទឧក្រិដ្ឋ ដូច្នេះតុលាការត្រូវស៊ើបសួរយ៉ាងហ្មត់ចត់បំផុត»។
ដោយឡែក មូលហេតុដែលតុលាការ សម្រេចបន្តឃុំខ្លួននេះ ក្រោមហេតុផលថា មិនចង់ឲ្យលោក កឹម សុខា ចេញទៅក្រៅឃុំប្រព្រឹត្តបទល្មើសផ្សេងទៀត ។ ជាពិសេសការឃុំខ្លួន វាក៏ផ្ដល់ភាពងាយស្រួលដល់នីតិវិធីស៊ើបអង្កេតរបស់ចៅក្រមលើករណីលោក កឹម សុខា ផងដែរ។ ជាមួយគ្នានេះ លោក ផែង ហេង មេធាវីការពារក្តីលោក កឹម សុខា បានត្រឹមតែបង្ហាញការខកចិត្តចំពោះការសម្រេចរបស់តុលាការនេះ។
លោក កឹម សុខា ប្រធានអតីតគណបក្សសង្គ្រោះជាតិ ត្រូវបានលោក ឈួន ចាន់ថា អគ្គព្រះរាជអាជ្ញារង នៃមហាអយ្យការអមតុលាការកំពូល បានចេញលិខិតអញ្ជើញលោក ផាន់ ច័ន្ទស័ក្តិ មេធាវីការពារក្ដីឲ្យលោកកឹម សុខា ចូលមកតុលាការកំពូល នៅថ្ងៃទី២២ ខែសីហា ឆ្នាំ២០១៨ វេលាម៉ោង៨ព្រឹក ដើម្បីចូលរួមសវនាការ អំពីដំណើររឿងរបស់លោក កឹម សុខា ពីបទឃុបឃិតជាមួយជនបរទេស ក្នុងការផ្តួលរំលំរដ្ឋាភិបាលស្របច្បាប់របស់កម្ពុជា។ រីឯសមាសភាពក្រុមប្រឹក្សាជំនុំជម្រះ រួមមាន លោកគង់ ស្រ៊ីម ប្រធាន លោកសម សិរីវឌ្ឍ លោកអ៊ីវ គឹមស្រ៊ី លោកស្រី ចាំង ស៊ីណាត និងលោក ច័ន្ទ រង្សី ចៅក្រមប្រឹក្សា នៃក្រុមប្រឹក្សាជំនុំជម្រះ។
គួរបញ្ជាក់ថា លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន នៅពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ លោក កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា ៤៤៣ នៃក្រមព្រហ្មទណ្ឌ។
បើតាមក្រមព្រហ្មទណ្ឌ នៃព្រះរាជាណាចក្រកម្ពុជា បទល្មើស “សន្ទិដ្ឋិភាពជាមួយបរទេស” គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូសរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ៕
