ភ្នំពេញ៖ តំណាងអយ្យការអមសាលាដំបូងរាជធានីភ្នំពេញ កាលពីយប់ ថ្ងៃទី២០ ខែសីហា ឆ្នាំ២០១៨ម្សិលមិញនេះ បានសម្រេចដោះលែងសកម្មជនដីធ្លីសហគមន៍បឹងកក់ម្នាក់ អ្នកស្រី ទេព វន្នី ចេញពីពន្ធនាគារ ក្រោយពេលគាត់បានអនុវត្តទោសនៅទីនោះ អស់រយៈពេលប្រហែល២ឆ្នាំ។
ការសម្រេចដោះលែងអ្នកស្រី ទេព វន្នី ចេញពីពន្ធនាគារ «ម២» ទាំងយប់នេះ បានកើតឡើងភ្លាមៗ បន្ទាប់ពីព្រះមហាក្សត្រ បានចេញព្រះរាជក្រឹត្យលើកលែងទោសដល់អ្នកស្រី និងសកម្មជនដីធ្លីចំនួន៣នាក់ទៀត រួមមាន អ្នកស្រី ហេង មុំ អ្នកស្រី បូ ឆវី និងអ្នកស្រី គង់ ចន្ថា តាមសំណើរបស់សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
ស្របពេលមានការដោះលែងអ្នកស្រី ទេព វន្នី និងសកម្មជនដីធ្លីនោះ សមាគមសភាអាស៊ានសម្រាប់សិទ្ធិមនុស្ស នៅថ្ងៃចន្ទ ទី២០ ខែសីហា ម្សិលមិញនេះបានសម្តែងការអបអរសាទរចំពោះការដោះលែងសកម្មជនដីធ្លីជាស្ត្រី៤នាក់។
លោក Charles Santiago ប្រធានសមាគមសភាអាស៊ានសម្រាប់សិទ្ធិមនុស្ស និងជាសមាជិកសភាម៉ាឡេស៊ី បានមានប្រសាសន៍ចំពោះការដោះលែងសកម្មជនទាំង៤នាក់នោះថា «គឺជាដំណឹងដ៏គួរឲ្យស្វាគមន៍ ដែលត្រូវបានរង់ចាំអស់រយៈពេលជាយូរមកហើយ។ អ្នកស្រី ទេព វន្នី និងសកម្មជនដីធ្លីដទៃទៀត មិនគួរត្រូវបានចាប់ដាក់ពន្ធនាគារ តាំងពីដំបូងឡើយនោះទេ។ ពួកគេគ្រាន់តែធ្វើយុទ្ធនាការដោយក្លាហាន និងសន្តិវិធី ដើម្បីការពារសហគមន៍របស់ពួកគេតែប៉ុណ្ណោះ»។ នេះបើយោងតាមសារមួយរបស់ការិយាល័យសមាគមសភាអាស៊ានសម្រាប់សិទ្ធិមនុស្សរបស់លោក Santiago ។
សូមបញ្ជាក់ថា អ្នកស្រី ទេព វន្នី ត្រូវបានតុលាការឃុំខ្លួន កាលពីថ្ងៃទី១៥ ខែសីហា ឆ្នាំ២០១៦ កន្លងទៅ ដោយសម្រេចផ្ដន្ទាទោសចំនួន២ឆ្នាំកន្លះ ក្រោមការចោទប្រកាន់ពីបទ «ប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ ដោយមានស្ថានទម្ងន់ទោស»។ ប៉ុន្តែទោះជាយ៉ាងណា សកម្មជនដីធ្លីរូបនេះ នៅតែបដិសេធនូវបទចោទនេះទាំងស្រុង៕
