ភ្នំពេញ៖ លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេស ដោយខ្លួនឯង នៅឯក្រៅប្រទេសណនោះ បានសរសេរ នៅលើគណនីហ្វេសប៊ុកផ្ទាល់ខ្លួនរបស់លោក កាលពីថ្ងៃទី១៩ ខែសីហា ឆ្នាំ២០១៨ ម្សិលមិញនេះថា បន្ទាប់ពីជាប់ឆ្នោត១២៥ លើ១២៥កៅអីហើយ គណបក្សប្រជាជនកម្ពុជា ក្រោមការដឹកនាំរបស់លោក ហ៊ុន សែន គួរតែដោះលែងលោក កឹម សុខា ប្រធានគណបក្សសង្រ្គោះជាតិ ដែលត្រូវតុលាការកំពូលរំលាយចោល។
លោក សម រង្ស៊ី បច្ចុប្បន្នកំពុងរស់នៅឯក្រៅប្រទេស នៅតែបង្ហាញពីការនឹកនាពីសុខទុក្ខរបស់លោក កឹម សុខា ដែលកំពុងជាប់ពន្ធនាគារនៅកម្ពុជា ដោយលោកបានសរសរបន្តថា ក្រោយពីគណបក្សប្រជាជនកម្ពុជា របស់លោក ហ៊ុន សែន បានទទួលជ័យជម្នះ១០០ភាគរយ ដោយបានដណ្តើមយកអាសនៈរបស់រដ្ឋសភា ទាំង១២៥ លើ១២៥ ក្នុងការបោះឆ្នោតថ្ងៃទី២៩ ខែកក្កដា កន្លងទៅនេះ រដ្ឋាភិបាលកម្ពុជា គួរតែដោះលែងលោក កឹម សុខា ប្រធានគណបក្សសង្គ្រោះជាតិ ដែលគេបានរំលាយ ចំពេលវេលា មុនថ្ងៃបោះឆ្នោត។
លោក សម រង្ស៊ី បានសរសេរបន្តថា បើនៅតែបន្តឃុំឃាំងលោក កឹម សុខា នៅក្នុងពន្ធនាគារទៀត បន្ទាប់ពីលោក ហ៊ុន សែន បានទទួលជ័យជម្នះ គួរឲ្យអស់សំណើច ក្នុងការបោះឆ្នោតក្លែងក្លាយកន្លងទៅនេះ។ រដ្ឋាភិបាលរបស់លោក ហ៊ុន សែន ច្បាស់ជាកាន់តែពិបាកការពារនូវភាពស្របច្បាប់របស់ខ្លួន ដែលបានធ្លាក់ចុះយ៉ាងខ្លាំង នៅចំពោះមុខសហគមន៍អន្តរជាតិ។ ត្រូវតែទម្លាក់ចោលនូវការចោទប្រកាន់លើគោក ពីបទ “ក្បត់ជាតិ” ដែលគេបានធ្វើឡើងមកលើទាំងលោក កឹម សុខា ទាំងលោក សម រង្ស៊ី ជាអតីតប្រធានគណបក្សសង្គ្រោះជាតិ។
ទោះជាយ៉ាងណា ជុំវិញការលើកឡើងរបស់លោក សម រង្ស៊ី ខាងលើនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានប្រតិកម្មតមវិញថា លោក សម រង្ស៊ី គិតតែពីនិយាយ ដោយមិនយល់ពីច្បាប់។ អ្នកទោសត្រូវតែជាប់ពន្ធនាគារ ដោយមិនគិតពីរឿងមុន ឬក្រោយការបោះឆ្នោតនោះឡើយ។
អ្នកនាំពាក្យរបស់គណបក្សកាន់អំណាចរូបនេះ បានបញ្ជាក់យ៉ាងដូច្នេះ ៖«ខ្ញុំយល់ថា គាត់លើកឡើងនេះ គឺអត់ប្រយោជន៍ទេ។ យើងមិនអាចយកការអនុវត្តច្បាប់ មកធ្វើជារឿងនយោបាយ ដើម្បីឲ្យមានការរួចទោសឡើយ»។ ដោយឡែក រាជរដ្ឋាភិបាលកម្ពុជា គឺនៅតែស្រប់ច្បាប់ ដោយមិនអាស្រ័យលើការទទួលស្គាល់ ឬការមិនទទួលស្គាល់របស់បរទេសនោះទេ។
អ្នកតាមដានស្ថានការណ៍នយោបាយខ្លះ មានសុទិដ្ឋិនិយមថា បើតាមដីការបស់តុលាការកំពូលដែលទើបនឹងចេញ កាលពីពេលថ្មីៗនេះ បានកំណត់យកថ្ងៃទី២២ ខែសីហា ឆ្នាំ២០១៨ខាងមុខនេះ ដើម្បីបើកសវនាការលើសំណើ សុំនៅក្រៅឃុំរបស់លោក កឹម សុខា។ ដូច្នេះ លោក កឹម សុខា អាចនឹងត្រូវបានដោះលែង ដូចលោក គឹម សុខ អ្នកវិភាគនយោបាយ ដែរ។ ពួកគេយល់ថា លោក កឹម សុខា និងសកម្មជននយោបាយផ្សេងទៀត គួរតែត្រូវតែបានដោះលែង ដើម្បីធ្វើឲ្យស្ថានការណ៍នយោបាយ នៅក្នុងប្រទេសកម្ពុជា មានភាពល្អប្រសើរឡើងវិញ។
សូមជម្រាបថា លោក កឹម សុខា អតីតប្រធានគណបក្សសង្គ្រោះជាតិ ត្រូវបានអាជ្ញាធរមានសមត្ថកិច្ចចុះទៅឃាត់ខ្លួនដល់លំនៅឋាន កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ ពោលគឺប្រមាណជាង៣ម៉ោង បន្ទាប់ពីសារព័ត៌មានហ្វ្រែសញូវ (Fresh News) ដែលគាំទ្ររដ្ឋាភិបាល បានផ្សព្វផ្សាយនូវវីដេអូឃ្លីបមួយ ទទួលបានពីម្ចាស់ហ្វេសប៊ុក (Facebook) ឈ្មោះកូនខ្មែរ ដែលសារព័ត៌មានមួយនេះ អះអាងថាជារបស់លោក កឹម សុខា។ តាមរយៈវីដេអូឃ្លីបនោះ ទើបរដ្ឋាភិបាលអះអាងថា លោក កឹម សុខា បានឃុបឃិតគ្នាជាមួយបរទេស ដើម្បីផ្តួលរំលំរដ្ឋាភិបាលកម្ពុជា ហើយរដ្ឋាភិបាលបានចោទពីបទក្បត់ជាតិ៕