កំពង់ធំ៖ ក្រោយពីមានពាក្យបណ្ដឹងពីប្រជាពលរដ្ឋមួយគ្រួសារដែលបានអះអាងថា ក្របីរបស់ខ្លួនចំនួន ៣ក្បាល ត្រូវបានចោរលួចកាលពីវេលាម៉ោង ២រំលងអាធ្រាត្រថ្ងៃទី ១៨ ខែសីហា ឆ្នាំ២០១៨ នៅផ្ទះស្ថិតនៅភូមិ គោកងួន ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ រួចមក សមត្ថកិច្ចក៏បានតាមដាន ដានជើងក្របីហើយក៏បានរកឃើញថា ត្រូវបានចោរកាប់សម្លាបប់យកសាច់ងាប់អស់ទៅហើយ ។
ក្របីដែលបាត់ចំនួន៣ក្បាល មានមេធំ១ក្បាល មេក្រមុំ១ក្បាល និងឈ្មោលស្ទាវ១ក្បាល ដែលមានម្ចាស់ឈ្មោះ ហ៊ន សុផល ភេទប្រុស អាយុ៤២ឆ្នាំ ប្រពន្ធឈ្មោះ ឆេង សុខន អាយុ៤២ឆ្នាំ ។
ដោយសារតែស្ថានភាពដីនារដូវវស្សាផងនោះ បានបន្សល់ទុកនូវដានជើងក្របីបាត់យ៉ាងច្បាស់ ដោយត្រូវបានគេរកឃើញថា ក្របីទាំងនោះដឹកចូលទៅក្នុងផ្ទះឈ្មោះ នុត សុធា ភេទប្រុស អាយុ៤៣ឆ្នាំ និងប្រពន្ធឈ្មោះ មឿន ផល្លី អាយុ៣៨ឆ្នាំ នៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ។
ពេលនោះ សមត្ថកិច្ចក៏បានចូលទៅដល់ផ្ទះខាងលើ ទើបដឹងថា ជាទីសត្វឃាត្ត (ទីតាំងកាប់គោ ជ្រូក ក្របីធ្វើអាជីវកម្ម) ។ ឃើញដូច្នេះសមត្ថកិច្ចក៏បានសុំដីការអនុញាតពីព្រះរាជអាជ្ញាអមសាលាដំបូងខេត្ត ដើម្បីចូលធ្វើការឆែកឆេរ ហើយបានរកឃើញវត្ថុតាងស្បែកក្របីចំនួន៣ សាច់ក្របី ដាក់ក្នុងបាវជាច្រើន, គ្រឿងក្នុងដាក់ក្នុងធុងក្លាស្សេ និងខ្សែចងក្របី គឺពិតជាវត្ថុតាងដែលម្ចាស់ក្របីស្គាល់ថា ជាសត្វពាហនៈរបស់ខ្លួនពិតប្រាកដមែន ជាពិសេសគឺស្បែកនិងខ្សែចំណងក្របី ។
យ៉ាងណាមិញ នៅក្នុងករណីចុះឆែកឆេរនេះ ម្ចាស់ផ្ទះទាំងពីរនាក់ប្ដីប្រពន្ធ ដែលជាជនសង្ស័យបាននាំគ្នារត់គេចខ្លួនបាត់បន្សល់តែសាច់ក្របីដែលកាប់រួចពាសពេញបន្ទប់ ប៉ុន្តែទោះជាយ៉ាងណា សមត្ថកិច្ចជំនាញកំពុងអនុវត្តន៍នីតិវិធីសុំដីកា ដើម្បីតាមចាប់ខ្លួនជនសង្ស័យមកទទួលទោសតាមច្បាប់ ៕
