ភ្នំពេញ៖ បុគ្គលិកឥណទានម្នាក់កំពុងដើរតាមផ្លូវសុខៗ ស្រាប់តែឆ្កែព្រុស និងដេញខាំ ធ្វើឱ្យគេផ្ទុះកំហឹង ក៏ស្ទុះទៅរើសដុំថ្មគប់សំដៅលើឆ្កែនោះ បែរដុំថ្មហោះទៅត្រូវចំថ្គាមក្មេងប្រុសម្នាក់ដែលកំពុងអង្គុយលើកង់ បណ្តាលឱ្យរងរបួសសន្លប់ស្តូកស្តឹង កាលពីវេលាម៉ោង១ និង៥៥នាទីរសៀល ថ្ងៃទី១៧ ខែសីហា ឆ្នាំ២០១៨ នៅតាមផ្លូវបេតុង ស្ថិតក្នុងក្រុមទី៧ ភូមិ១ សង្កាត់ច្រាំងចំរេះ១ ខណ្ឌឫស្សីកែវ។
មន្ត្រីនគរបាលខណ្ឌឫស្សីកែវ បានឲ្យដឹងថា ក្មេងប្រុសរងគ្រោះ ឈ្មោះ សឿង ពុធសីហា អាយុ១៣ឆ្នាំ មុខរបរនៅផ្ទះ មានលំនៅផ្ទះលេខ៥៣០ ក្រុមទី៧ ភូមិ១ សង្កាត់ច្រាំងចំរេះ១ (រងរបួសថ្គាមខាងឆ្វេង) ខណ្ឌឫស្សីកែវ។ រីឯជនបង្ក ឈ្មោះ យិន យ៉ាន អាយុ២៨ឆ្នាំ មុខរបរបុគ្គលិកឥណទាន ស្នាក់នៅផ្ទះជួលមួយកន្លែង ស្ថិតក្នុងភូមិចំរើនផល សង្កាត់បឹងទំពុន ខណ្ឌមានជ័យ។
មន្ត្រីនគរបាលដដែល បានបន្តថា បន្ទាប់ពីឃាត់ខ្លួនរួចមក ជនសង័្សយបានរៀបរាប់ប្រាប់សមត្ថកិច្ចតាមដំណើររឿងថា តាមពិតទៅ រូបគេគ្មានបំណងគប់ទៅលើក្មេងប្រុសរងគ្រោះនោះទេ។ ប៉ុន្តែមុនពេលកើតហេតុ រូបគេបានដើរតាមបណ្ដោយផ្លូវ សំដៅទៅរបងផ្ទះត្រង់ចំណុចខាងលើ ស្រាប់តែមានឆ្កែ១ក្បាលចេញមកព្រុស និងដេញខាំរូបគេ។ ឃើញបែបនេះ រូបគេបានផ្ទុះកំហឹង ក៏រើសដុំថ្មគប់សំដៅទៅលើឆ្កែនោះ ស្រាប់តែដុំថ្មនោះបានហោះទៅត្រូវក្មេងប្រុសរងគ្រោះទៅវិញ។
ក្រោយពេលកើតហេតុ ក្មេងប្រុសរងគ្រោះត្រូវបានសាច់ញាតិ និងក្រុមគ្រួសារប្រញាប់ដឹកបញ្ជូនទៅព្យាបាល នៅក្នុងមន្ទីរពេទ្យគន្ធបុប្ផា។ ដោយឡែកជនបង្កត្រូវបានសមត្ថកិច្ចឃាត់ខ្លួន នាំទៅកាន់អធិការដ្ឋាននគរបាលខណ្ឌឫស្សីកែវ ដើម្បីសាកសួរ និងចាត់ការតាមនីតិវិធី៕
