ភ្នំពេញ៖ បន្ទាប់ពីអនុវត្តទោសទណ្ឌ នៅក្នុងពន្ធនាគាររយៈពេល១៨ខែ ហើយត្រូវតុលាការដោះលែងឲ្យមានសេរីភាពឡើងវិញ កាលពីថ្ងៃទី១៧ ខែសីហា ឆ្នាំ២០១៨ម្សិលមិញនេះ លោក គឹម សុខ នៅតែអះអាងថា អ្វីដែលធ្លាប់ធ្វើកន្លងមក ដូចជាបញ្ហានយោបាយ និងសង្គម គឺលោកនៅតែបន្តធ្វើ បើទោះជាមានការបំភិតបំភ័យ ឬត្រូវជាប់ពន្ធនាគារម្តងទៀតក្ដី ក៏លោកនៅតែមិនតក់ស្លុត ឬចាញ់ច្រាបដែរ។
លោក គឹម សុខ អ្នកវិភាគនយោបាយដ៏ល្បីមួយ ត្រូវបានសមត្ថកិច្ចកម្ពុជា ចាប់បញ្ជូនទៅកាន់សាលាដំបូងរាជធានី ហើយតុលាការបានសម្រេចបញ្ជូនគាត់ទៅដាក់ នៅក្នុងពន្ធនាគារ ចាប់តាំងពីថ្ងៃទី១៧ ខែកុម្ភៈ ឆ្នាំ២០១៧។ រហូមកដល់ថ្ងៃទី១៧ ខែសីហា ឆ្នាំ២០១៨នេះ គឺលោក គឹម សុខ បានអនុវត្តទោសនៅក្នុងពន្ធនាគារមានរយៈពេល១៨ខែ។ ការអនុវត្តទោស នៅក្នុងពន្ធនាគារ រយៈពេល១៨ខែនេះ បានធ្វើឲ្យលោក គឹម សុខ ស្រកទម្ងន់យ៉ាងច្រើន និងមានសាច់ឈាមស្លេកស្លាំង។ ប៉ុន្តែស្មារតី និងភាពក្លាហានរបស់អ្នកវិភាគដ៏មានប្រជាប្រិយភាពរូបនេះ នៅតែមានរាំងមាំដដែល។
មុនពេលមានការចាប់ខ្លួននោះ លោក គឹម សុខ បានចោទប្រកាន់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ថា សម្ដេចជាអ្នកនៅពីក្រោយខ្នង នៃអំពើឃាតកម្មលើលោកបណ្ឌិត កែម ឡី។ បន្ទាប់ពីលោកចោទប្រកាន់ឥតសំចៃបែបនេះ អាជ្ញាធរមានសមត្ថកិច្ចក៏បានចាប់ខ្លួនលោក បញ្ជូនទៅតុលាការរាជធានីភ្នំពេញ ហើយសាលាដំបូងក៏បានសម្រេចឃុំខ្លួនលោកដាក់ នៅក្នុងពន្ធនាគារព្រៃស។
ថ្វីបើលោកត្រូវបានអាជ្ញាធរមានសមត្ថកិច្ចចាប់ដាក់គុកម្ដងរួចមកហើយក្ដី ប៉ុន្តែលោក គឹម សុខ ដែលទើបនឹងចេញពីពន្ធនាគារ នៅតែអះអាងថា បើនិយាយទៅ គុក-ច្រវាក់ ប្រហែលជាមិនអាចមានឥទ្ធិពល ដើម្បីបន្សាបការប្តេជ្ញារបស់លោក គឹម សុខ ឡើយ ហើយលោកនៅតែមិនបាក់ស្បាតដែរ។
លោក គឹម សុខ បានប្រាប់ពីឆន្ទៈ និងបំណងរបស់លោក ក្នុងការបន្តនូវការអត្ថាធិប្បាយពីបញ្ហានយោបាយ និងការធ្វើកិច្ចការសង្គម។ លោក ហ៊ានអះអាងយ៉ាងម៉ឺងម៉ាត់ ដោយសារតែលោក ជឿលើភាពស្អាតស្អំរបស់លោក ពីព្រោះអ្វីដែលលោកធ្វើ គឺស្របតាមច្បាប់ និងដើម្បីផលប្រយោជន៍របស់ប្រទេសជាតិខ្មែរ មិនបម្រើឲ្យបរទេស។
លោក គឹម សុខ បានថ្លែងទាំងអួលដើមកទៅកាន់ព្រះសង្ឃ ប្រជាពលរដ្ឋ និងអ្នកកាសែត នៅក្នុងវត្តពោធិយារាមហៅវត្តចាស់ ដែលមកទទួលលោកថា៖ «ខ្ញុំនិយាយប៉ុណ្ណឹង គេចាប់ខ្ញុំដាក់គុក។ ចេញពីគុក ខ្ញុំនឹងធ្វើលើសដើម ពីព្រោះខ្ញុំមិនមែនជាភេរវករ ឬក៏ចង់ផ្តួលរំលំរដ្ឋាភិបាលទេ។ ខ្ញុំធ្វើក្នុងផ្លូវមួយ ដើម្បីលើកតម្កើងនូវលទ្ធិប្រជាធិបតេយ្យ និងយុត្តិធម៌ ដែលជាគោលនៃនីតិរដ្ឋ»។
ជាមួយគ្នានេះ លោក គឹម សុខ បានបង្ហាញពីគោលជំហររបស់លោកថា លោកនឹងបន្តធ្វើកិច្ចការរបស់លោក ដែលធ្លាប់ធ្វើពីមុនមក។ រីឯកិច្ចការងារ ដែលលោកនឹងបន្តធ្វើ រួមមានការស្រាវជ្រាវ និងការចងក្រងគំនិត ដើម្បីបណ្តុះបណ្តាល និងផ្សព្វផ្សាយទៅកាន់ប្រជាពលរដ្ឋទូទៅ ឲ្យចូលរួម ឲ្យបានកាន់តែផុសផុល ក្នុងកិច្ចការសង្គម និងការលើកកម្ពស់នូវលទ្ធិប្រជាធិបតេយ្យ។ លោកបានចាត់ទុករាល់កិច្ចការទាំងនេះថា ជាកាតព្វកិច្ច ដែលលោកត្រូវតែធ្វើ ជាពិសេស ស្ថិតក្នុងស្ថានភាពបច្ចុប្បន្ន។
លោក គឹម សុខ បានបន្តថា «ខ្ញុំចែករំលែកគំនិតរបស់ខ្ញុំ គឺវាអត់មានអី្វដែលខុសច្បាប់ទេ។ បើអត់ខុសច្បាប់ យើងត្រូវតែបន្ត តែធ្វើដោយអហិង្សា។ បើយើងអត់ហ៊ានបន្ត មានន័យថា អ្នកប្រព្រឹត្តខុសច្បាប់ នឹងកាន់តែមានទឹកមាត់លេប [បានចិត្ត] ហើយយកឈ្នះយើង យកឈ្នះជាតិយើង»។
នៅពេលអ្នកកាសែតសួរថា «តើលោកបារម្ភ ឬក៏មានកង្វល់ទេ បើលោកបន្តធ្វើកិច្ចការដូចមុន?» លោក គឹម សុខ បានឆ្លើយដោយឥតរារែកថា ការបារម្ភ ប្រាកដជាមាន ហើយកង្វល់ក៏មិនអត់ដែរ។ ប៉ុន្តែលោកបន្ថែមថា ក្តីបារម្ភ និងក្តីកង្វល់ទាំងនេះ មិនមែនជាឧបសគ្គ ដែលរុញឲ្យលោកចាកចេញពីការងារ ដែលលោកចង់ធ្វើនោះឡើយ។
លោក គឹម សុខ បានបន្តថា កង្វល់របស់ជាតិ គឺធំជាងកង្វល់បុគ្គលផ្ទាល់ខ្លួនលោកទៅទៀត។ នេះគឺជាមូលហេតុ ធ្វើឲ្យលោកមិនអាចបិទមាត់ និងធ្មេចភ្នែកពីរឿងនយោបាយ ហើយនិងកិច្ចការសង្គម។ ទោះជាយ៉ាងណា លោកនៅតែមិនតក់ស្លុតនឹងការបំភិតបំភ័យនោះទេ។ បើយើងគ្រាន់តែជាប់គុកមួយឆ្នាំ-ពីរឆ្នាំ ហើយយើងនាំគ្នាចុះចាញ់គេ អ៊ីចឹងយូរៗទៅ យើងនឹងចុះចាញ់គេដោយខ្លួនឯងរហូត។ ពេលយើងចុះចាញ់គេ មិនមែនបុគ្គលជាអ្នកចាញ់ទេ គឺជាតិយើងជាអ្នកចាញ់។ បើយើង ត្រៀមខ្លួនរួចហើយថា ចូលគុក កុំខ្លាច។ បើថ្ងៃណាគេចាប់ដាក់គុក ជាប់គុកទៀតទៅ»។
ក្រោយពេលនិយាយពីរឿងសង្គម និងនយោបាយនោះ លោក គឹម សុខ រៀបរាប់ពីស្ថានភាពនៅក្នុងពន្ធនាគារប្រាប់ប្រជាពលរដ្ឋថា សូម្បីតែសរសេរ អានសៀវភៅ ឬកាសែត ក៏លោកមិនត្រូវបានគេអនុញ្ញាតដែរ ខណៈបទបញ្ជាផ្ទៃក្នុងរបស់ពន្ធនាគារ មិនបានហាមឃាត់។ រហូតទាល់តែលោកជាប់ពន្ធនាគារជិត១៥ខែ ទើបគេបន្ធូរបន្ថយសម្រាប់រូុបលោកបន្តិច ដោយបើកសិទ្ធិឲ្យអានកាសែត។ លោក លាតត្រដាងថា៖«គេមិនឲ្យខ្ញុំអាន មិនឲ្យខ្ញុំសរសេរអ្វីទាំងអស់ ពោគឺគេ(មន្ត្រីពន្ធនាគារ)ធ្វើតែលើខ្ញុំ។ ដោយឡែកអ្នកផ្សេងៗ គឺអានបាន»។
ក្រោយចេញពីពន្ធនាគារ លោក គឹម សុខ បាននឹកឃើញស្តាម៉ាតស្តុបបូកគោមុនគេ ដែលជាកន្លែងឃាតក បាញ់សម្លាប់លោកបណ្ឌិត កែម ឡី កាលពីជាងពីរឆ្នាំមុន។ លោក បានទៅទីនោះ ដើម្បីអុចធូបនិងគោរពវិញ្ញាណក្ខន្ធលោកបណ្ឌិត កែម ឡី ដែលលោក លើកតម្កើងជាអ្នកស្នេហាជាតិ។ បន្ទាប់មក លោក គឹម សុខ បានធ្វើដំណើរទៅកាន់វត្តចាស់ ដែលជាទីតម្កល់សពលោកបណ្ឌិត កែម ឡី រយៈពេលកន្លះខែ មុននឹងបញ្ជូនទៅបញ្ចុះនៅស្រុកកំណើត ក្នុងខេត្តតាកែវ។ នៅពេលដល់វត្តចាស់ លោក គឹម សុខ បាននិមន្តព្រះសង្ឃឲ្យស្រោចទឹក ដើម្បីលាងជម្រះនូវអពមង្គលទាំងអម្បាលម៉ាន ចេញពីជីវិតរបស់លោក។
ការទទួលបានសេរីភាពឡើងវិញនាពេលនេះ អាចនិយាយបានថា ភាពខ្មៅងងឹត បានរសាត់ផុតពីជីវិតរបស់លោក គឹម សុខ ហើយ។ ប៉ុន្តែ លោកមិនទាន់ស្រឡះចិត្តទាំងស្រុងឡើយ ដ្បិតលោកនៅជាប់បណ្តឹងផ្សេងទៀត ពីព្រោះលោកបានរងបណ្តឹងដល់ទៅពីរ ពីសំណាក់លោក គី តិច មេធាវីតំណាងឲ្យសម្តេច ហ៊ុន សែន។
លោក គឹម សុខ រងបណ្តឹងទីមួយ ដោយសារតែលោកចោទប្រកាន់សម្តេច ហ៊ុន សែន ថា នៅពីក្រោយខ្នង នៃអំពើឃាតកម្មលើលោកបណ្ឌិត កែម ឡី អ្នកវិភាគនយោបាយ និងសង្គមដ៏ល្បីល្បាញមួយរូប។ បណ្តឹងទីមួយ ធ្វើឲ្យលោក គឹម សុខ ត្រូវបានជាប់ពន្ធនាគាររយៈពេល១៨ខែ គឺចាប់ពីថ្ងៃទី១៧ ខែកុម្ភៈ ឆ្នាំ២០១៧ ដល់ថ្ងៃទី១៧ សីហា ឆ្នាំ២០១៨។ ឥឡូវបណ្តឹងទីមួយបានចប់សព្វគ្រប់ហើយ បន្ទាប់ពីលោក បានអនុវត្តទោសគ្រប់តាមកាលកំណត់។ ប៉ុន្តែបណ្តឹងទីពីរ កំពុងស្ថិតក្នុងដៃរបស់ព្រះរាជអាជ្ញានៅឡើយ ដោយមិនទាន់ជំនុំជម្រះ ឬសម្រេចសេចក្តីនៅឡើយ។ ដូច្នេះតាមនីតិវិធី ព្រះរាជអាជ្ញាអាចកោះហៅលោក គឹម សុខ ទៅសាកសួរគ្រប់ពេល។ រីឯដើមចម នាំឲ្យលោករងបណ្តឹងទីពីរនេះ គឺដោយសារតែលោក និយាយថាប្រព័ន្ធមួយ ដែលស្ថិតនៅក្រោមការគ្រប់គ្រងរបស់រដ្ឋាភិបាលបច្ចុប្បន្ន មានការសម្លាប់មនុស្ស ហើយរកឃាតកមិនឃើញ។
ទោះជាក្រោយពេលចេញពីពន្ធនាគារ ហើយលោក គឹម សុខ នៅរងនឹងបណ្ដឹងមួយទៀតក្ដី តែលោក គឹម សុខ នៅតែប្រកាសប្រាប់មហាជនថា លោកនឹងរស់នៅក្នុងប្រទេសកម្ពុជា ដោយមិនគេចខ្លួនទៅក្រៅប្រទេសឡើយ៕