ភ្នំពេញ ៖ វាគឺជារឿងគួរឱ្យហួសចិត្ត និងគួរឱ្យអស់សំណើចមួយ ដែល Facebook យ៉ាងហោចណាស់ ក៏៦០ Facebook ដែរ បានយកផលិតផលម៉ាក Firmax 3 Cream ទៅប្រកាសផ្សព្វផ្សាយលក់ថា ជាឱសថដែលអាចព្យាបាលជំងឺបានយ៉ាងច្រើនប្រភេទដែលអាចប្រៀបបានទៅនឹងឱសថទិព្វ នៅក្នុងរឿងនិទានទេវកថាដូច្នោះដែរ គឺពួកអ្នកលក់បានបង្ហោះផ្សព្វផ្សាយថា Firmax 3 Cream អាចព្យាបាលជំងឺសន្លាក់ដៃជើង ជំងឺបេះដូង ខ្លាញ់រុំសសៃឈាម ជំងឺទឹកនោមផ្អែម ទឹកនោមប្រៃ ជំងឺក្រពះពោះវៀន ជំងឺឬសដូងបាទ ជំងឺស្ត្រីគ្រប់ប្រភេទ ជំងឺលើសឈាម ឡើងជាតិស្ករ ជំងឺថ្លើម ជំងឺសួត ជំងឺរលាកច្រមុះ រក្សាសម្រស់ឱ្យនៅក្មេងវ័យ ការរលាក និង ជំងឺជាច្រើនមុខផ្សេងៗទៀត ។
ពិតជាមិនចាញ់ថ្នាំ ប៉ាហ៊ី សោះឡើយ គឺថា គ្រាន់តែ Firmax 3 Cream មួយមុខសោះ អាចព្យាបាលជំងឺបានយ៉ាងច្រើនដល់ម្ល៉ឹង តើអាចឱ្យគេជឿយ៉ាងម៉េចទៅ ?
ប៉ុន្តែអ្វីដែលរឹតតែហួសចិត្តទៅទៀតនោះគឺក្រសួងសុខាភិបាល បានប្រកាសថា ជាសាធារណៈថា ” Firmax 3 Cream គឺជាគ្រឿងសម្អាង ( មិនមែនជាឱសថទេ ) ដូច្នេះ វាគ្មានគុណភាពបង្ការ ឬ ព្យាបាលជំងឺដូចដែលបានផ្សព្វផ្សាយកុហកបំផ្លើសឡើយ ” ។
ថាមែន គឺមែន ! មើលចុះ គ្រាន់តែជា ឱសថ ឬជាគ្រឿងសម្អាង ក៏អ្នកផ្សព្វផ្សាយលក់ទាំងនោះ គ្មានទាំងស្គាល់ផង ! តើរំពឹងលើអ្វី ? បើថា មិនមានជំនាញខាងពេទ្យក៏ហីទៅចុះ ប៉ុន្តែយ៉ាងហោចណាស់ ក៏គួរតែស្គាល់ពាក្យថា «Cream» ដែលជាភាសាអង់គ្លេស បកប្រែជាភាសាខ្មែរ «ក្រែម» ដែលខ្មែរយើងច្រើនហៅថា «ម្សៅ» សម្រាប់ផាត់មុខឱ្យស្រស់ស្អាតនោះដែរ ។
ក្រសួងសុខាភិបាល បានចេញសេចក្តីប្រកាសជាសាធារណៈថា ដើម្បីចៀសវាងខាតបង់ថវិកាដោយឥតប្រយោជន៍ និង អាចប៉ពាល់ដល់សុខភាព ឬឈានដល់បាត់បង់អាយុជីវិតផងនោះ សូមសាធារណជនទាំងអស់បញ្ឈប់ការប្រើប្រាស់ផលិតផល Firmax 3 Cream នេះ ហើយរាល់គណនី Facebook ទាំងអស់ដែលបានផ្សព្វផ្សាយលក់ផលិតផលនេះ ក៏ត្រូវបញ្ឈប់សកម្មភាពជាបន្ទាន់ដែរ ។
ក្រសួងសុខាភិបាល នឹងចាត់វិធានការតាមច្បាប់ចំពោះអ្នកនាំចូល និងលក់ផលិតផល Firmax 3 Cream ព្រោះផលិតផលនេះ គ្មានច្បាប់អនុញ្ញាតឡើយ ។ ហើយអ្នកលក់ទាំងនោះ បានយកឈ្មោះក្រុមហ៊ុន RF3 WORLD ( CAMBODIA ) Co,Ltd ទៅប្រើទៀតផង ។
បន្ថែមលើនេះ បើតាមគេហទំព័រក្នុងស្រុកមួយផ្សាយអោយដឹងថា លោកអគ្គនាយកក្រុមហ៊ុន RF3 World Cambodia លោក វណ្ណ សុភោនោ ដែលបាននាំចូលផ្តាច់មុខនូវផលិតផលដ៍ល្អឯកមកពីប្រទេសម៉ាឡេស៊ី ដែលមានដូចជា គ្រីម Firmax3 ដែលជាគ្រីមពូកែសក្ត័សិទ្ធ…. ដែលត្រូវបានទទួលស្គាល់ និងប្រើប្រាស់យ៉ាងទូលំទូលាយក្នុងសកលលោក បានការគាំទ្រ និងពេញនិយមនៅបណ្ដាប្រទេសសមាជិកអាស៊ាន នាំចូលដោយក្រុមហ៊ុន RF3 WORLD CAMBODIA CO.,LTD ដែលបានទទួលស្គាល់ដោយក្រសួងសុខាភិបាលនៃព្រះរាជាណាចក្រកម្ពុជាបញ្ជីការលេខ No. CAMN 15369 CN-17 ថែមទៀត ៕ ប្រភព ៖ ធ្លាប់តែឃើញផលិតផលល្បី ពេលនេះមកស្គាល់CEO របស់ផលិតផល Firmax3 ស្រស់សង្ហាយ៉ាងណា ដែលនាំយកគ្រីមដ៏ល្អពូកែ ផ្តាច់មុខនៅកម្ពុជា