ខេត្តកណ្ដាល៖ បុរសម្នាក់ចេញពីផឹកស្រវឹង ដើរមកដល់ផ្ទះ រករឿងប្រពន្ធ រហូតបង្កនូវអំពើហិង្សា ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង៦ និង៣០នាទីយប់ ថ្ងៃទី១៦ ខែសីហា ឆ្នាំ២០១៨ នៅក្នុងភូមិរាំងដេក២ ឃុំគគីរធំ ស្រុកកៀនស្វាយ។
មន្ត្រីនគរបាលស្រុកកៀនស្វាយ បានឲ្យដឹងថា ជនសង័្សយជាប់ព័ន្ធនឹងអំពើហិង្សា ហើយត្រូវសមត្ថកិច្ចឃាត់ខ្លួននោះ ឈ្មោះ ងិន សុធា អាយុ៤៨ឆ្នាំ ជនជាតិខ្មែរ មុខរបរជាកសិករ។ រីឯជនរងគ្រោះជាប្រពន្ធ ឈ្មោះ តោ សុផាន់ អាយុ៤៨ឆ្នាំ ជនជាតិខ្មែរ។ ពួកគេរស់នៅក្នុងភូមិរាំងដេក២ ឃុំគគីរធំ ស្រុកកៀនស្វាយ ខេត្តកណ្ដាល។ ក្រៅពីឃាត់ខ្លួនជនសង័្សយ សមត្ថកិច្ចបានដកហូតបានដំបងប្ញស្សី១ ប្រវែង១៧៥សង់ទីម៉ែត្រ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវអំពើហិង្សានោះ ជនសង័្សយទើបនឹងចេញមកពីផឹកស្រវឹង។ លុះពេលគេដើរមកដល់ផ្ទះ ក៏រករឿងប្រពន្ធ ទើបបង្កឲ្យមានការឈ្លោះប្រកែកគ្នា ស្រាប់តែជនសង័្សយបានស្ទុះទៅទាញដំបងឫស្សី វាយទៅលើជនរងគ្រោះ បណ្ដាលឲ្យរងរបួសជាំពេញខ្លួន។
ក្រោយពេលកើតហេតុ នគរបាលមូលដ្ឋានបានចុះទៅឃាត់ខ្លួនជនសង្ស័យ នាំកាន់ប៉ុស្តិ៍នគរបាលរដ្ឋបាល ដើម្បីសាកសួរ រួចហើយកសាងសំណុំរឿងបញ្ជូនទៅកាន់អធិការដ្ឋាននគរបាលស្រុក ចាត់ការបន្តតាមនីតិវិធី៕