ភ្នំពេញ៖ បន្ទាប់ពីអនុវត្តទោសគ្រប់តាមកាលកំណត់នោះមក សាលាដំបូងរាជធានីភ្នំពេញ បានសម្រេចដោះលែងលោក គឹម សុខ អ្នកវិភាគនយោបាយ នៅថ្ងៃទី១៧ ខែសីហា ឆ្នាំ២០១៨នេះ។
លោក គឹម សុខ អ្នកវិភាគនយោបាយដ៏ល្បីមួយ ត្រូវបានសមត្ថកិច្ចកម្ពុជា ចាប់បញ្ជូនទៅកាន់សាលាដំបូងរាជធានី ហើយតុលាការបានសម្រេចបញ្ជូនគាត់ទៅដាក់ នៅក្នុងពន្ធនាគារ តាំងពីថ្ងៃទី១៧ ខែកុម្ភៈ ឆ្នាំ២០១៧។ រហូមកដល់ថ្ងៃទី១៧ ខែសីហា ឆ្នាំ២០១៨នេះ គឺលោក គឹម សុខ បានអនុវត្តទោសនៅក្នុងពន្ធនាគារមានរយៈពេល១ឆ្នាំកន្លះ។ មុនពេលត្រូវចាប់ខ្លួនដាក់ពន្ធនាគារនោះ លោក គឹម សុខ បានចោទប្រកាន់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ថា នៅពីក្រោយខ្នង នៃអំពើឃាតកម្មលើលោកបណ្ឌិត កែម ឡី។
លោក ជូង ជូងី មេធាវីការពារក្ដីឲ្យលោក គឹម សុខ បានប្រាប់អ្នកកាសែតថា៖ «គេដោះលែងគាត់ហើយ នៅវេលាម៉ោង៩កន្លះព្រឹក ថ្ងៃនេះ។ ខ្ញុំបានទៅទទួលគាត់ដល់ពន្ធនាគារ»។
សូមជម្រាបថា សាលាដំបូងរាជធានីភ្នំពេញ បានចោទប្រកាន់អ្នកវិភាគរូបនេះ ពី «បទបរិហារកេរ្តិ៍ជាសាធារណៈ» និង«បទញុះញង់ ឲ្យមានភាពវឹកវរដល់សន្តិសុខសង្គម»។
គួរបញ្ជាក់ថា រសៀលថ្ងៃទី១៤ ខែសីហា ឆ្នាំ២០១៨នេះ លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានឲ្យមន្ត្រីពន្ធនាគារព្រៃសម១នាំខ្លួនទណ្ឌិត គឹម សុខ អ្នកវិភាគនយោបាយយកមកសាកសួររឿងផ្សេងមួយទៀត តែលោកព្រះរាជអាជ្ញាមិនទាន់បានចោទប្រកាន់នៅឡើយ។ បើយោងទៅតាមការសម្រេចផ្តន្ទាទោស១៨ខែ លើអ្នកវិភាគនយោបាយ គឹម សុខ គិតពីថ្ងៃចាប់ឃុំខ្លួន កាលពីថ្ងៃទី១៧ ខែកុម្ភៈ ឆ្នាំ២០១៧កន្លងមក អ្នកវិភាគនយោបាយរូបនេះជិតបានរួចផុតពីទោសហើយ គិតមកដល់ថ្ងៃទី១៧ ខែសីហា ឆ្នាំ២០១៨ខាងមុខនេះ ។ តែរសៀលនេះ គឺនាំមកសាកសួររឿងផ្សេងមួយទៀតដែលព្រះរាជអាជ្ញាមិនទាន់ចោទប្រកាន់៕
