ភ្នំពេញ៖ ថ្វីបើគណបក្សយុវជនកម្ពុជាបានដាក់ពាក្យបណ្ដឹងទៅគណៈកម្មាធិការជាតិរៀបចំការបោះឆ្នោត នៅព្រឹក ថ្ងៃចន្ទ ទី១៣ ខែសីហា ដើម្បីទាមទារឲ្យ គ.ជ.ប រាប់សន្លឹកឆ្នោតឡើង នៅតាមបណ្ដាខេត្ត-ក្រុងចំនួន១៧ក្ដី ប៉ុន្តែនៅថ្ងៃដដែលនេះ មន្ត្រីគ.ជ.ប បានអះអាងថា គជបនឹងមិនពន្យារពេលប្រកាសលទ្ធផលបោះឆ្នោតផ្លូវការ នៅថ្ងៃទី១៥ ខែសីហា ឡើយ។
មន្រ្ដីជាន់ខ្ពស់របស់គណៈកម្មាធិការជាតិរៀបចំការបោះឆ្នោតបានបញ្ជាក់សាជាថ្មីថា ជំហររបស់គ.ជ.ប គឺមិនលើកពេលចំពោះប្រកាសលទ្ធផលបោះឆ្នោតផ្លូវការ នៅថ្ងៃទី១៥ ខែសីហា ឆ្នាំ២០១៨ខាងមុខនេះឡើយ។ ការប្រកាសបែបនេះ គឺធ្វើឡើងបន្ទាប់ពីប្រធានគណបក្សយុវជនកម្ពុជា លោក ពេជ្រ ស្រស់ នៅថ្ងៃចន្ទនេះបានដាក់ពាក្យបណ្ដឹងទៅកាន់គណៈកម្មាធិការជាតិរៀបចំការបោះឆ្នោត ដើម្បីទាមទារឲ្យ គ.ជ.ប រាប់សន្លឹកឆ្នោតឡើងវិញ ក្នុងខេត្តក្រុងចំនួន១៧។
លោក ពេជ្រ ស្រស់ ប្រធានគណបក្សយុវជនកម្ពុជា បានថ្លែងក្រោយដាក់ពាក្យបណ្ដឹង នៅថ្ងៃចន្ទនេះថា ទោះជាដំណោះស្រាយពី គ.ជ.ប បែបណាក៏ដោយ ក៏គណបក្សយុវជនកម្ពុជា ពេញចិត្តទទួលទទួលយកដែរ។ ប៉ុន្តែលោកគ្រាន់តែចង់ដឹងថា សំឡេងគាំទ្រចំនួន៨៤របស់គណបក្សយុវជនកម្ពុជា ក្នុងចំណោមសំឡេងគាំទ្រ សរុប ៣៩០០១៧ សំឡេងបាត់ទៅណា ខណៈការប្រកាសលទ្ធផលបោះឆ្នោតបណ្ដោះអាសន្ន នៅថ្ងៃទី១១ ខែសីហា បែរជាបង្ហាញថា បក្សយុវជនបាត់៨៤សំឡេងទៅវិញ។
លោក ពេជ្រ ស្រស់ បានចោទសួរថា នេះមកពីកំហុសបច្ចេកទេស ឬដោយសារអ្នកអានលទ្ធផលឆ្នោតប្រកាសច្រឡំ។ ទោះបីជាសំឡេងគាំទ្ររបស់គណបក្សយុវជនកម្ពុជា មិនបានមួយកៅអីក៏ដោយ តែលោកចង់ឲ្យគ.ជ.ប បង្ហាញភាពច្បាស់លាស់ តាមរយៈការរាប់សន្លឹកឆ្នោតឡើងវិញ។
ទោះជាយ៉ាងណាជុំវិញពាក្យបណ្ដឹងរបស់គណបក្សយុវជនកម្ពុជានេះ លោក ហង្ស ពុទ្ធា អ្នកនាំពាក្យ នៃគណៈកម្មាធិការជាតិរៀបចំការបោះឆ្នោត បានឲ្យដឹងថា ក្រុមការងារគ.ជ.ប នឹងពិនិត្យលើខ្លឹមសារនៃពាក្យបណ្ដឹងនេះ។ រីឯការបើកកញ្ចប់សន្លឹកឆ្នោតរាប់ឡើងវិញ គឺលុះណាតែមានអ្នកតវ៉ា នៅក្នុងអំឡុងពេលរាប់សន្លឹកឆ្នោត នៅក្នុងការិយាល័យបោះឆ្នោតណាមួយ។ ប៉ុន្តែចំពោះករណីគណបក្សយុវជននេះ គឺប្រធានគណបក្សបានទទួលស្គាល់បញ្ហានេះ ដោយសារទំនងជាមកពីកំហុសបច្ចេកទេស។ ដូច្នេះករណីនេះ ទំនងជាមិនឈានដល់ការបើកកញ្ចប់សន្លឹកឆ្នោតរាប់ឡើងវិញឡើយ។
ជាការឆ្លើយតបទៅនឹងអ្នកនាំពាក្យ នៃគណៈកម្មាធិការជាតិរៀបចំការបោះឆ្នោតនោះ លោក ពេជ្រ ស្រស់ ប្រធានគណបក្សយុវជនកម្ពុជា បានអះអាងថា បើគ.ជ.ប ស្អាតស្អំ និងសុក្រឹត្យនោះ ប្រាដកជាហ៊ានបើកកញ្ចប់សន្លឹកឆ្នោតរាប់ឡើងវិញ៕