ភ្នំពេញ៖ បើតាមកាលបរិច្ឆេទ គណៈកម្មាធិការជាតិរៀបចំការបោះឆ្នោត(គ.ជ.ប) នឹងប្រកាសលទ្ធផលផ្លូវការ នៃការបោះឆ្នោត នៅថ្ងៃទី១៥ ខែសីហា ឆ្នាំ២០១៨ខាងមុខនេះ ប៉ុន្តែដោយសារមានគណបក្សនយោបាយខ្លះបានដាក់បណ្តឹងទាមទារឲ្យរាប់សន្លឹកឆ្នោតឡើងវិញ ទើបគ.ជ.បសម្រេចផ្អាកនូវការប្រកាសលទ្ធផលនោះសិន។
នៅក្នុងចំណោមគណបក្សនយោបាយទាំង២០ដែលបានចូលរួម នៅក្នុងការបោះឆ្នោតជ្រើសតាំងតំណាងរាស្ដ្រ នាអាណត្តិតី៦នេះ គឺគណបក្សយុវជនកម្ពុជា ដោយដឹកនាំដោយលោក ពេជ្រ ស្រស់ បានដាក់ពាក្យបណ្ដឹងទៅកាន់គណៈកម្មាធិការជាតិរៀបចំការបោះឆ្នោត មុនគេ គឺនៅព្រឹកថ្ងៃទី១៣ ខែសីហា ឆ្នាំ២០១៨ នេះ។
លោកប្រធានគណបក្សយុវជនកម្ពុជា បានសរសេរ នៅលើបណ្តាញសង្គមហ្វេសប៊ុករបស់ខ្លួនថា មូលហេតុដែលលោកបានដាក់បណ្តឹងនោះ គឺដោយសារតែលទ្ធផលបណ្ដោះអាសន្ន ដែលគ.ជ.ប ទើបនឹងប្រកាស ហាក់ដូចជាមិនទាន់មានលក្ខណៈត្រឹមត្រូវនៅឡើយ។
ដោយឡែកលោក ហង្ស ពុទ្ធា អ្នកនាំពាក្យ នៃគណៈកម្មាធិការជាតិរៀបចំការបោះឆ្នោត(គ.ជ.ប) បានប្រាក់ដល់អ្នកសារព័ត៌មានថា ក្រៅពីគណបក្សយុជនកម្ពុជា គ.ជ.ប ពុំទាន់ឃើញមានគណបក្សណាផ្សេង ដាក់បណ្តឹងនោះទេ។ ដូច្នេះ គ.ជ.ប ត្រូវពិនិត្យជាមុនសិន ហើយបន្ទាប់មកទើបសម្រេចថា ត្រូវរាប់សន្លឹកឆ្នោតឡើងវិញ តាមបណ្តឹងរបស់គណបក្សយុវជនកម្ពុជា ឬមិនរាប់។ លោកបញ្ជាក់យ៉ាងដូច្នេះថា៖ «យើងពិនិត្យមើលសិន មិនមែនចេះតែធ្វើតាមការស្នើសុំនោះទេ»។
អ្នកនាំពាក្យរូបនេះ បានបន្តថា គណៈកម្មាធិការជាតិរៀបចំការបោះឆ្នោត(គ.ជ.ប) មានរយៈពេល១០ថ្ងៃ ក្នុងការដោះស្រាយបណ្តឹងរបស់គណបក្ស។ ប៉ុន្តែក្រោយការដោះស្រាយបណ្តឹងរបស់គណបក្សរួចទើបគ.ជ.ប អាចប្រកាសលទ្ធផលផ្លូរការ នៃការបោះឆ្នោត។ ដូច្នេះក្នុងរយៈពេល១០ថ្ងៃនេះ គ.ជ.ប ត្រូវតែមានដំណោះស្រាយលើបណ្តឹងរបស់គណបក្ស។
សូមបញ្ជាក់ថា នីតិវិធី នៃការប្រកាសលទ្ធផលបោះឆ្នោត មានបីដំណាក់កាល គឺលទ្ធផលបឋម លទ្ធផលបណ្តោះអាសន្ន និងលទ្ធផលផ្លូវការ។ លទ្ធផលបឋម និងលទ្ធផលបណ្តោះអាសន្ន ត្រូវបាន ប្រកាសរួចរាល់អស់ហើយ។ តួលេខ នៃលទ្ធផលបឋម និងលទ្ធផលបណ្តោះអាសន្ន ខុសគ្នាតិចតួចប៉ុណ្ណោះ។
លទ្ធផលទាំងពីរលើកនេះ បង្ហាញថា គណបក្សប្រជាជនកម្ពុជា ទទួលបានសន្លឹកឆ្នោតជាង៤,៨លាននាក់ ឬស្មើនឹងជាង៧៦ភាគរយ។ ដូច្នេះគេអាចសន្និដ្ឋានជាមុនថា ក្នុងចំណោមគណបក្សទាំង២០ ដែលចូលរួមប្រកួតប្រជែង នៅក្នុងការបោះឆ្នោតលើកនេះ ប្រហែលជាមានតែគណបក្សប្រជាជនកម្ពុជាទេ ដែលមានលទ្ធភាពទទួលបានអាសនៈក្នុងរដ្ឋសភា៕