ភ្នំពេញ៖ បន្ទាប់ពីលោក សុខ ទូច គំរាមចាប់អ្នកដែលដឹកនាំយុទ្ធនាការរកស្នាមមេដៃ ដើម្បីទាមទារកោះត្រល់មកវិញនោះមក គណបក្សខ្មែរក្រោក នៅរសៀល ថ្ងៃទី៧ ខែសីហា ឆ្នាំ២០១៨នេះ បានរៀបចំពាក្យបណ្តឹង ប្តឹងលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ទៅកាន់តុលាការ។
លោក សុខសុវណ្ណ វឌ្ឍនា សារពង្ស ប្រធានគណបក្សខ្មែរក្រោក បានប្រាប់អ្នកកាសែត នាថ្ងៃទី៧ ខែសីហា នេះថា គណបក្សរបស់លោកបានរៀបចំពាក្យបណ្តឹងរួចរាល់ហើយ ដើម្បីដាក់ជូនតុលាការ នារសៀលថ្ងៃទី៧ ខែសីហា នេះ។ លោក សារពង្ស អះអាងថា គណបក្សរបស់លោកនឹងប្តឹងលោកបណ្ឌិត សុខ ទូច ពីបទញុះញង់ឲ្យមានការរើសអើង និងពីបទជ្រៀតជ្រែក ដោយខុសច្បាប់នៅក្នុងការបំពេញមុខងារសាធារណៈ។
លោកប្រធានគណបក្សខ្មែរក្រោក បានបញ្ជាក់ថា ការប្តឹងនេះ គឺធ្វើឡើង បន្ទាប់ពីលោកបណ្ឌិត សុខ ទូច បានប្រើងារជាប្រធានរាជបណ្ឌិត្យសភាកម្ពុជា វាយតម្លៃពីរឿងនយោបាយផ្តេសផ្តាស និងវាយប្រហារមកលើយុទ្ធនាការប្រមូលស្នាមមេដៃ ដើម្បីតវ៉ាយកកោះត្រល់មកវិញ។ លោកបន្ថែមថា លោក សុខ ទូច ថែមទាំងគំរាមចាប់អ្នកធ្វើយុទ្ធនាការដាក់ពន្ធនាគារ ប្រសិនបើលោកជាអាជ្ញាធរ។
ដោយឡែកលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានលើកឡើងថា លោកមិនបានគំរាមអ្នកណាទេ។ រីឯការដាក់ពាក្យបណ្តឹងរបស់គណបក្សខ្មែរក្រោក គឺជាសិទ្ធិរបស់គណបក្សនេះ ហើយលោករង់ចាំដើរតាមក្រោយ។ បើយើងនិយាយជាការពិតទៅ ប្រធានគណបក្សខ្មែរក្រោក គ្រាន់តែចង់ល្បីប៉ុណ្ណោះ ដើម្បីផ្សាយពាណិជ្ជកម្មលក់ដីឡូដ៍។
ទោះជាយ៉ាងណា គណបក្សខ្មែរក្រោករបស់លោក សុខសុវណ្ណ វឌ្ឍនា សារពង្ស អះអាងថា គណបក្សរបស់លោកនឹងធ្វើយុទ្ធនាការប្រមូលស្នាមមេដៃចំនួន៥ម៉ឺន ក្នុងបំណងទាមទារកោះត្រល់មកវិញ។ យុទ្ធនាការរបស់គណបក្សលោក នឹងចាប់នៅថ្ងៃទី៨ ខែសីហា នៅស្នាក់ការកណ្តាលគណបក្ស។
យោងតាមរយៈទំព័រហ្វេសប៊ុកលោក សុខសុវណ្ណ វឌ្ឍនា សារពង្ស បានអះអាងថា ប្រសិនបើយន្តការថ្នាក់ជាតិ ដែលប្ដឹងទៅក្រុមប្រឹក្សាធម្មនុញ្ញ មិនត្រូវបានដោះស្រាយនោះ គណបក្សរបស់លោកនឹងបន្តទៅយន្តការអន្តរជាតិ នៅតុលាការក្រុងឡាអេ បន្ថែមទៀត។
ដោយឡែកលោក សុខ ទូច បានបញ្ជាក់ថា ការប្តឹងទាមទារកោះត្រង់មកវិញ មិនអាចទៅរួចនោះទេ ព្រោះករណីកោះត្រល់នេះ មិនមែនជារឿងគណបក្សទេ គឺជារឿងរវាងរដ្ឋាភិបាល និងរដ្ឋាភិបាលនៃប្រទេសមួយទៀតតែប៉ុណ្ណោះ៕