បរទេស៖ ក្រុមហ៊ុនផលិតយន្តហោះ AIRBUS កាលពីពេលថ្មីនេះ បានផលិតយន្តដឹកទំនិញរបស់ខ្លួន មានរូបរាងដូចជាត្រីបាឡែនមួយ ម៉ាក Beluga XL ហើយយន្តហោះនេះ នឹងចាប់ផ្ដើមប្រតិបត្តិការហោះហើរផ្នែកពាណិជ្ជកម្ម នៅក្នុងអំឡុងពាក់កណ្ដាល ឆ្នាំ២០១៩ខាងមុខនេះ។
ក្រុមហ៊ុនផលិតយន្តហោះដ៏ល្បីល្បាញ នៅអឺរ៉ុបមួយនេះបានផលិត និងចាប់ផ្ដើមហោះហើរយន្តហោះ Beluga XL និងចុះចត នៅក្នុងអាកាសយានដ្ឋាន Toulouse-Blagnac កាលពីព្រឹក ថ្ងៃព្រហស្បតិ៍ ទី១៩ ខែកក្កដា ឆ្នាំ២០១៨ ម្សិលមិញនេះ។ នៅក្នុងហោះហើរជាលើកដំបូងរបស់យន្តហោះមួយនេះ គឺមានមនុស្សប្រហែលជា១ម៉ឺននាក់បានចេញមកអបអរសាទរ ហើយមនុស្សទាំងនោះ ភាគច្រើនជាបុគ្គលិក និងអ្នកម៉ៅការរបស់ក្រុមហ៊ុនផលិតយន្តហោះនានានៅអឺរ៉ុប។
យន្តហោះ Beluga XL នេះមានបណ្តោយវែងជាង៦ម៉ែត្រ និងទទឹងវែងជាង១ម៉ែត្រ ហើយផ្ទុកលើសទម្ងន់៦តោន បើធៀបទៅនឹងយន្តហោះស៊េរីចាស់ Beluga ST ហើយយន្តហោះថ្មីនេះ នឹងចូលមកជំនួសយន្តហោះ Beluga ST ។ ក្បាលយន្តហោះនេះមើលទៅ គឺមានរាងស្រដៀងនឹងត្រីបាឡែនយក្ស។ មុននឹងចេញម៉ូតបែបនេះ បុគ្គលិកក្រុមហ៊ុន Airbus ត្រូវបានស្នើឱ្យបោះឆ្នោតសម្រាប់ការម៉ូតនេះផងដែរ ដោយមានសំឡេងឆ្នោត៤០ ភាគរយគាំទ្រម៉ូតមួយហ្នឹង៕